'ബീറ്റ്‌സ് ഓഫ് കേരള'യുടെ ഓണാഘോഷം;  ആയിരങ്ങൾ പങ്കെടുത്തു

നോർത്ത് ജഴ്‌സി ∙ വിഭവ സമൃദ്ധമായ ഓണ സദ്യയോടെ തുടങ്ങി, താലപ്പൊലിയുടെയും, ചെണ്ട മേളത്തിന്റെയും, വർണാഭമായ ഘോഷയാത്രയോടെ മാവേലിയെ വരവേറ്റും കൊണ്ട് നോർത്ത് ജഴ്‌സിയിലെ ഏറ്റവും വിപുലമായ ഓണം യുവ മലയാളി സംഘടനയായ 'ബീറ്റ്‌സ് ഓഫ് കേരള'യുടെയും പ്രസിഡന്റ് അനൂപ് ജോർജ് മറ്റു സംഘടനാ ഭാരവാഹികളുടെയും നേതൃത്വത്തിൽ പൊടി പൊടിച്ചു.  വിപുലമായ സംഗീത നൃത്ത പരിപാടികളോടെ ഈ വർഷത്തെ ഓണം കെങ്കേമമായിരുന്നു.

പഴയിടം മോഹനൻ നമ്പൂതിരിയും അമേരിക്കയിലെ പ്രശസ്ത സിത്താർ പാലസ് റസ്റ്റോറന്റും ചേർന്നൊരുക്കിയ സദ്യ ആയിരുന്നു ഈ വർഷത്തെ മുഖ്യാകർഷണം.  40-ഇൽ ഏറെ വിഭവങ്ങൾ അണിനിരന്ന ട്രൈ സ്റ്റേറ്റിലെ ഏറ്റവും വലിയ ഓണസദ്യയാണ് ബീറ്റ്‌സ് ഓഫ് കേരള 1000-ത്തിലേറെ അതിഥികൾക്കായീ ഈ വർഷം ഒരുക്കിയത്.  

2004-ൽ 'ബെർഗൻ ടൈഗേഴ്‌സ്' ക്രിക്കറ്റ് ടീമിലെഅംഗങ്ങളായ ചെറുപ്പക്കാരുടെ കൂട്ടായ്മയിൽ തുടങ്ങിയ 'ബീറ്റ്‌സ് ഓഫ് കേരള' ഇന്ന് വളർന്നു പന്തലിച്ചു ആയിരത്തിൽപരം ആളുകൾക്ക് ഓണസദ്യ നല്കാൻ തക്കത്തിൽ വളർന്നതിന്റെ പിന്നിൽ സംഘടനയിലെ അംഗങ്ങളുടെ ആത്മാർഥമായ സഹകരണം ഉണ്ട്. നിസ്വാർത്ഥമായ സേവനം ആപ്തവാക്യമായി എടുത്തു പ്രവർത്തിക്കുന്നതാണ് ഇതിന്റെ വിജയം. 

അംഗങ്ങൾക്കും മറ്റുള്ളവർക്കുമായി ബീറ്റ്‌സ് ഓഫ് കേരള നിരവധി പ്രോഗ്രാമുകൾ നടത്താറുണ്ട്.  കലാപരമായി മാത്രമല്ല  കേരളത്തിൽ നിരവധി ചാരിറ്റി പ്രവർത്തനങ്ങൾ ഇതിനോടകം ബീറ്റ്‌സ് ഓഫ് കേരള നടത്തിയിട്ടുണ്ട്.  വീടുകൾ വയ്ക്കുന്നതിനും, മെഡിക്കൽ സഹായങ്ങൾ നൽകുന്നതിലും ഈ സംഘടന വളരെ കാര്യങ്ങൾ ചെയ്യുന്നു.

പൊതുസമ്മേളനത്തിൽ സംഘടനയുടെ പ്രസിഡന്റ് അനൂപ് ജോർജ്, കൂടാതെ  എക്സിക്യൂട്ടീവ് അംഗങ്ങളും, പ്ലാറ്റിനം സ്പോൺസറും ചേർന്ന് നിലവിളക്കു കൊളുത്തി കലാപരിപാടികൾക്ക് തുടക്കം കുറിച്ചു.  തുടർന്ന് അനൂപ് ജോർജ്‌ വിശിഷ്ടാതിഥികൾക്കും, പങ്കെടുക്കുന്നവർക്കും സ്വാഗതം അറിയിച്ചു.  തുടർന്ന് സ്വാമി പാർഥസാരഥി പിള്ള ഓണ സന്ദേശം നൽകി.  

ഗായകൻ ജെംസൺ കുര്യാക്കോസ്  മാസ്റ്റർ ഓഫ് സെറിമോണി ആയി പരിപാടികൾ നിയന്ത്രിച്ചു.  കലാപരിപാടികൾക്ക് തുടക്കം കുറിച്ച് കൊണ്ട് ബീറ്റ്‌സ് ഓഫ് കേരളയുടെ അംഗങ്ങൾ പ്രത്യേകമായി അവതരിപ്പിച്ച 'തിരുവാതിര' കാണികളുടെ പ്രശംസ നേടിയെടുത്തു.  അകലെ ആണെങ്കിലും ദൈവത്തിന്റെ സ്വന്തം നാടിന്റെ ഓർമ്മകൾ ആണ് തിരുവാതിരയിലൂടെ വേദിയിൽ അവതരിപ്പിച്ചതെന്ന് അംഗങ്ങൾ പറയുകയുണ്ടതായി. 

പിന്നീട് അമേരിക്കയിൽ ജനിച്ചു വളർന്ന കലാകാരന്മാരുടെ സംഗീതകൂട്ടം 'FAM-JAM' ന്റെ അകമ്പടിയോടെ നിറഞ്ഞ സദസ്സിൽ സംഗീതസന്ധ്യ അരങ്ങേറി.  ഗായിക അനിത കൃഷ്ണ ഗാനങ്ങൾ ആലപിച്ചു. കൂടാതെ ജെംസൺ കുര്യാക്കോസും ഗാനങ്ങൾ ആലപിച്ചു കാണികളെ കയ്യിലെടുത്തു.  മാലിനി നായരുടെ നേതൃത്വത്തിലുള്ള സൗപർണിക ഡാൻസ് അക്കാദമിയുടെ മികച്ച നൃത്തം വേദിയിൽ അരങ്ങേറി.

ഓണം കമ്മിറ്റി അംഗങ്ങൾ ആയ അനൂപ് ജോർജ്, സാജൻ ബാബു, ജുബിൻ മുണ്ടക്കൽ, സുമേഷ് സുരേന്ദ്രൻ, ഷൈബു വര്ഗീസ്, ബിബിൻ മൈക്കൽ, ജിൻസ് തര്യൻ എന്നിവരോടൊപ്പം മറ്റു ബീറ്റ്സ്‌ ഓഫ് കേരള മെംബേഴ്സും പരിപാടികൾക്ക് നേതൃത്വം നൽകി.