ഭാരം കുറയ്ക്കാനുള്ള രണ്ട് മരുന്നുകള്ക്ക് ഇന്ത്യയില് അംഗീകാരം
![pills-ShotPrime-Studio-Shutterstock pills-ShotPrime-Studio-Shutterstock](https://img-mm.manoramaonline.com/content/dam/mm/mo/health/health-news/images/2024/7/2/pills-ShotPrime-Studio-Shutterstock.jpg?w=1120&h=583)
Mail This Article
പ്രമേഹം നിയന്ത്രിക്കാനും ഭാരം കുറയ്ക്കാനും വിദേശരാജ്യങ്ങളിലൊക്കെ വ്യാപകമായി ഉപയോഗിച്ച് വരുന്ന ടിര്സെപ്റ്റൈഡ് മരുന്ന് ഇറക്കുമതി നടത്താനും വിപണനം ചെയ്യാനും ഡ്രഗ് കണ്ട്രോള് ജനറല് ഓഫ് ഇന്ത്യയുടെ വിദഗ്ധ സമിതി അനുമതി നല്കി. എലി ലില്ലി നിര്മ്മിക്കുന്ന ഈ മരുന്ന് മൗഞ്ചാരോ, സെപ്ബൗണ്ട് എന്നീ പേരുകളിലാണ് അമേരിക്കയില് വിപണനം നടത്തുന്നത്. വിദഗ്ധ സമിതിയുടെ ശുപാര്ശകളുടെ അടിസ്ഥാനത്തില് ഡ്രഗ് കണ്ട്രോള് ജനറല് ഓഫ് ഇന്ത്യ അന്തിമ അനുമതി നല്കും.
കുത്തിവയ്പ്പിലൂടെ എടുക്കുന്ന ഈ മരുന്ന് ശരീരഭാരം 18 ശതമാനം വരെ കുറയ്ക്കാന് സഹായിക്കുമെന്ന് പഠനങ്ങള് ചൂണ്ടിക്കാട്ടുന്നു. മൗഞ്ചാരോ പ്രമേഹത്തിനും സെപ്ബൗണ്ട് ഭാരം കുറയ്ക്കലിനും ഉദ്ദേശിച്ചുള്ളതാണ്.
![pills-anandaBGD-istockphoto pills-anandaBGD-istockphoto](https://img-mm.manoramaonline.com/content/dam/mm/mo/config-assets/mo-default.jpg?w=845&h=440)
2.5 മില്ലിഗ്രാം മുതല് 12.5 മില്ലിഗ്രാം വരെയുള്ള ആറ് വ്യത്യസ്ത ഡോസുകള് അടങ്ങിയ കുത്തിവയ്പ്പ് രൂപത്തിലുള്ള മരുന്നുകള്ക്ക് രണ്ട് ആഗോള ക്ലിനിക്കല് പരീക്ഷണങ്ങളുടെ അടിസ്ഥാനത്തിലാണ് ഇന്ത്യയിലെ വിദഗ്ധ സമിതി അംഗീകാരം നല്കിയത്. ടൈപ്പ് 2 പ്രമേഹമില്ലാത്ത മുതിര്ന്നവരില് 72 ആഴ്ച കൊണ്ട് 18 ശതമാനം ഭാരം കുറയ്ക്കാന് ടിര്സെപ്റ്റൈഡിന് കഴിയുമെന്ന് പഠനത്തില് കണ്ടെത്തിയിരുന്നു. പ്രമേഹ ബാധിതരില് ശരാശരി 12 ശതമാനം ഭാരം കുറയ്ക്കാനും മരുന്നിന് സാധിച്ചു.
എന്നാല് ഈ മരുന്നുകള് നിര്ദ്ദേശിക്കുന്ന രോഗികളെ ശ്രദ്ധാപൂര്വം തിരഞ്ഞെടുക്കണമെന്നും വിദഗ്ധ സമിതി ശുപാര്ശ ചെയ്യുന്നു. പാന്ക്രിയാറ്റിക് രോഗചരിത്രമുള്ളവര്ക്കും എന്ഡോക്രൈന് സംവിധാനത്തിന് തകരാറുകള് ഉള്ളവര്ക്കും ഛര്ദ്ദി, ഓക്കാനം പോലുള്ള പ്രശ്നങ്ങള് ഉള്ളവര്ക്കും ഈ മരുന്നുകള് നല്കരുതെന്ന് സമിതി പറയുന്നു. രോഗികള് ആദ്യം ഭക്ഷണക്രമീകരണവും വ്യായാമവും പിന്തുടരാന് നിര്ദ്ദേശിക്കണമെന്നും സമിതി നിഷ്ക്കര്ഷിക്കുന്നു. ഇവയ്ക്കെല്ലാം ശേഷവും ഭാരം കുറയുന്നില്ലെങ്കില് മാത്രമേ ഈ മരുന്നുകള് ശുപാര്ശ ചെയ്യാവൂ എന്നും സമിതി കൂട്ടിച്ചേര്ക്കുന്നു. ഇന്ത്യയിലെ ഈ മരുന്നുകളുടെ വില അറിവായിട്ടില്ലെങ്കിലും പ്രതിമാസം 15,000 രൂപയെങ്കിലും ആകുമെന്നാണ് പ്രതീക്ഷിക്കുന്നത്.