മോഹന്‍ലാല്‍ സാർ എന്നും ചെറുപ്പം: പ്രഭാസ്
Mail This Article
മോഹന്‍ലാലിന്റെ കട്ട ആരാധകനാണ് താനെന്നും സാഹോയുടെ ഔദ്യോഗിക ട്രെയിലര്‍ റിലീസ് ചടങ്ങിന് അദ്ദേഹം എത്തിയതിന് പ്രത്യേകം നന്ദിയുണ്ടെന്നും പ്രഭാസ്. കൊച്ചിയിൽ നടന്ന സാഹോ ട്രെയിലര്‍ ലോഞ്ച് ചടങ്ങില്‍ പങ്കെടുത്ത് സംസാരിക്കുകയായിരുന്നു അദ്ദേഹം. ചടങ്ങില്‍ മോഹന്‍ലാല്‍, സംവിധായകന്‍ ബി ഉണ്ണിക്കൃഷ്ണന്‍, മംമ്ത മോഹന്‍ദാസ്, ആന്റണി പെരുമ്പാവൂര്‍ തുടങ്ങിയവര്‍ സന്നിഹിതരായിരുന്നു..
താന്‍ കണ്ടതില്‍ വച്ച് ഏറ്റവും നല്ല നടന്‍മാരില്‍ ഒരാളാണ് മോഹന്‍ലാല്‍ എന്നും താന്‍ അദ്ദേഹത്തിന്റെ കട്ട ഫാനാണെന്നും വേദിയില്‍ വച്ച് പ്രഭാസ് പറഞ്ഞപ്പോള്‍ കാണികളില്‍ നിന്നും കരഘോഷം മുഴങ്ങി. ഹൈദരാബാദില്‍ വച്ച് മുമ്പ് കണ്ടിട്ടുണ്ടെന്നും ലാല്‍ സാര്‍ എന്നും ചെറുപ്പമായി തന്നെയിരിക്കുന്നുവെന്നും പ്രഭാസ് പറഞ്ഞു.
പ്രഭാസ്- ശ്രദ്ധാ കപൂര്‍ താര ജോഡികളായി എത്തുന്ന ബിഗ്ബജറ്റ് ചിത്രം ആഗസ്റ്റ് 30നാണ് റിലീസ് ചെയ്യുന്നത്. ഹിന്ദി, തമിഴ്, തെലുങ്ക് ഭാഷകളില്‍ പ്രദര്‍ശനത്തിനെത്തുന്ന ചിത്രത്തിന്റെ മലയാളം ഡബ്ബ് പതിപ്പും അന്നേ ദിവസം തന്നെ ഇറങ്ങും. റണ്‍ രാജ റണ്‍ എന്ന തെലുങ്ക് ചിത്രത്തിലൂടെ ശ്രദ്ധേയനായ സുജീത്താണ് സംവിധാനം ചെയ്യുന്നത്. പ്രശസ്ത ഹോളിവുഡ് ആക്ഷന് കോ-ഓര്‍ഡിനേറ്റര്‍ കെന്നി ബേറ്റ്സാണ് ചിത്രത്തിന്റെ ആക്ഷന് കൊറിയോഗ്രാഫര്‍.
യുവി ക്രിയേഷന്‍സിന്റെ ബാനറില്‍ നിര്‍മ്മിക്കുന്ന സിനിമയില്‍ മലയാള ചലച്ചിത്രതാരം ലാലും ശ്രദ്ധേയമായ കഥാപാത്രമായി എത്തുന്നു. ജാക്കി ഷ്രോഫ്, നീല്‍ നിതിന്‍ മുകേഷ്, മന്ദിര ബേദി, ചങ്കി പാണ്ഡേ, മഹേഷ് മഞ്ജറേക്കര്‍, അരുണ്‍ വിജയ്, മുരളി ശര്‍മ തുടങ്ങിയവരും ചിത്രത്തില്‍ വേഷമിടുന്നു. ബി. ഉണ്ണികൃഷ്ണൻ ആണ് ചിത്രം കേരളത്തിൽ വിതരണത്തിനെത്തിക്കുന്നത്.
