കച്ച കെട്ടി അനു സിത്താര; മാമാങ്കത്തിലെ ലുക്ക് പുറത്ത്
Mail This Article
മമ്മൂട്ടി ചിത്രം മാമാങ്കത്തിലെ പുതിയ ലൊക്കേഷന്‍ ചിത്രങ്ങൾ പുറത്തുവിട്ട് അണിയറപ്രവര്‍ത്തകര്‍. ഉണ്ണിമുകുന്ദന്റെയും അനുസിത്താരയുടെയും ചിത്രങ്ങളാണ് സമൂഹമാധ്യമങ്ങളിൽ തരംഗമാകുന്നത്.
കച്ച കെട്ടിയുടുത്ത വസ്ത്രത്തിൽ നാടൻ സുന്ദരിയായി അനു എത്തുന്നു. ഉണ്ണി മുകുന്ദൻ അവതരിപ്പിക്കുന്ന ചന്ദ്രോത്ത് പണിക്കര്‍ എന്ന ആയോധന കലയിലെ അഗ്രഗണ്യനായ കഥാപാത്രത്തിന്റെ ജോടിയായാണ് അനു ചിത്രത്തിലെത്തുന്നത്.
മമ്മൂട്ടിയുടെ കരിയറിലെ ഏറ്റവും വലിയ ചിത്രമെന്ന ഖ്യാതിയോടെയാണ് മാമാങ്കം റിലീസിനെത്തുന്നത്. സുദേവ് നായര്‍, ബാലതാരം അച്യുതൻ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
എം. പത്മകുമാര്‍ സംവിധാനം ചെയ്യുന്ന ചിത്രം കാവ്യാ ഫിലിംസിന്റെ ബാനറില്‍ വേണു കുന്നപ്പിള്ളി നിർമിക്കുന്നു. 18-ാം നൂറ്റാണ്ടിന് മുമ്പ് മലയാള മണ്ണിൽ ജീവൻവെടിഞ്ഞ ധീര ചാവേറുകളുടെ ഇതിഹാസകഥയാണ് മാമാങ്കത്തിൽ പറയുന്നത്. ശങ്കര്‍ രാമകൃഷ്ണനാണ് ചിത്രത്തിന്‍റെ തിരക്കഥ ഒരുക്കിയിരിക്കുന്നത്. മലയാളത്തിനൊപ്പം തമിഴ്, തെലുങ്ക്, ഹിന്ദി ഭാഷകളിലും ചിത്രം റിലീസ് ചെയ്യുന്നുണ്ട്. കനിഹ, അനു സിത്താര, പ്രാചി തെഹ്ലാൻ, ഇനിയ എന്നിവരാണ് ചിത്രത്തിൽ നായികമാര്‍.
സിദ്ദീഖ്, തരുണ്‍ അറോറ, സുരേഷ് കൃഷ്ണ, രതീഷ് കൃഷ്ണ, തുടങ്ങിയവരാണ് ചിത്രത്തിലെ മറ്റ് പ്രധാന താരങ്ങള്‍. എം. ജയചന്ദ്രന്‍ ആണ് ചിത്രത്തിന് വേണ്ടി സംഗീതം ഒരുക്കിയിരിക്കുന്നത്. ചിത്രത്തിന്‍റെ ടീസറിനും മേക്കിങ് വിഡിയോയ്ക്കും സംഗീതം നൽകിയിരുന്നത് ജോസഫ് എന്ന ചിത്രത്തിന് സംഗീതം നൽകിയതോടെ ഏറെ ശ്രദ്ധേയനായ രഞ്ജിൻ രാജാണ്. ഗാനങ്ങൾ ഇതിനോടകം ശ്രദ്ധനേടിക്കഴിഞ്ഞു.
