ആഘോഷത്തിമിർപ്പിൽ ഒമർ ലുലുവിന്റെ ‘ധമാക്ക’ മേക്കിങ് വിഡിയോ
Mail This Article
ഒമർ ലുലു സംവിധാനം ചെയ്യുന്ന ധമാക്കയുടെ മേക്കിങ് വിഡിയോ പുറത്തിറങ്ങി. ഫെസ്റ്റിവൽ അന്തരീക്ഷത്തിൽ ഹ്യൂമർ നിറഞ്ഞ ഒരു ചിത്രമായിരിക്കും ധമാക്കയെന്ന സൂചന മേക്കിങ് വിഡിയോ നൽകുന്നുണ്ട്‌. ഇതിനോടകം തരംഗമായിമാറിയ, ഗോപി സുന്ദർ ഈണം പകർന്ന "ഹാപ്പി ഹാപ്പി" എന്ന ഗാനമാണ്‌ പശ്ചാത്തലത്തിലുള്ളത്‌.
ഒളിമ്പ്യന്‍ അന്തോണി ആദം എന്ന ചിത്രത്തില്‍ മോഹന്‍ലാലിനൊപ്പം ടോണി ഐസക് എന്ന കഥാപാത്രത്തെ മനോഹരമാക്കിയ അരുണാണ് ധമാക്കയില്‍ നായകന്‍. ഒമര്‍ ലുലുവിന്റെ നാലാമത്തെ ചിത്രമായ ധമാക്കയില്‍ സലിം കുമാര്‍, ഇന്നസെന്റ്, സാബുമോന്‍, മുകേഷ്, ഉര്‍വശി, നിക്കി ഗല്‍റാണി, നേഹ, ഹരീഷ് കണാരന്‍, ധര്‍മജന്‍ ബോള്‍ഗാട്ടി, ഷാലിന്‍ സോയ തുടങ്ങി വന്‍താരനിരയാണ് അണിനിരക്കുന്നത്. ക്രിസ്മസ്‌ റിലീസ്‌ ആയി ഡിസംബർ 20നു ചിത്രം തിയറ്ററുകളിലെത്തും.
ഗുഡ്‌ലൈന്‍ പ്രൊഡക്‌ഷന്‍സ് അവതരിപ്പിക്കുന്ന ചിത്രം എം.കെ. നാസര്‍ ആണ് നിർമിക്കുന്നത്. സാരംഗ് ജയപ്രകാഷ്, വേണു ഓവി കിരണ്‍ ലാല്‍ എന്നിവര്‍ ചേര്‍ന്നാണ് തിരക്കഥയും സംഭാഷണവും ഒരുക്കുന്നത്. ഗോപി സുന്ദര്‍ സംഗീതം. ഛായാഗ്രഹണം സിനോജ് പി. അയ്യപ്പന്‍.
