ലൂക്കയെ കയ്യിലെടുത്ത് വിക്രത്തിന്റെ ക്യൂട്ട് എൻട്രി; അമ്പരന്ന് മിയ

മിയയുടെ മകൻ ലൂക്കയെ കയ്യിലെടുത്തു വേദിയിലെത്തി ചിയാൻ വിക്രം. കോബ്രയിൽ അഭിനയിച്ചതിന്റെ അനുഭവം വേദിയിൽ പങ്കുവയ്ക്കുന്നതിനിടയിലാണ്, മിയയെ അമ്പരപ്പിച്ച് വിക്രത്തിന്റെ ക്യൂട്ട് എൻട്രി. ലൂക്കയെ കയ്യിലെടുത്തു വേദിയിലെത്തിയ വിക്രം, 'ഇത് കോബ്ര ബേബി' ആണെന്നും വെളിപ്പെടുത്തി. മിയയ്ക്ക് വിക്രം നൽകിയ സർപ്രൈസ് ആർപ്പുവിളികളോടെയാണ് സദസ് സ്വീകരിച്ചത്. 

കോബ്രയിൽ അഭിനയിച്ചുകൊണ്ടിരിക്കുമ്പോൾ ജീവിതത്തിൽ സംഭവിച്ച മാറ്റങ്ങളെക്കുറിച്ച് മിയ ജോർജ്ജ് വാചാലയായി. "2019ൽ തുടങ്ങിയ പടമാണ് കോബ്ര. കോവിഡും കാര്യങ്ങളുമായി ചിത്രം നീണ്ടു പോയി. 2020 ജനുവരിയിലാണ് ഞാൻ ഈ പടത്തിൽ ജോയിൻ ചെയ്യുന്നത്. ആ സമയത്ത് ഞാൻ സിംഗിൾ ആയിരുന്നു. സെക്കൻഡ് ഷെഡ്യൂളിൽ പോയപ്പോൾ ഞാൻ വിവാഹിതയായി. മൂന്നാമത്തെ ഷെഡ്യൂളിൽ പോയപ്പോൾ ഞാൻ അഞ്ചു മാസം ഗർഭിണി ആയിരുന്നു," മിയ പുഞ്ചിരിയോടെ വെളിപ്പെടുത്തി. "സിനിമ റിലീസ് ആകുമ്പോൾ കൊച്ച് ഇവിടെ വന്നു," എന്ന് ആരാധകരെ ആവേശത്തോടെ അറിയിച്ച വിക്രം ഉടനെ കുഞ്ഞു ലൂക്കയെ കയ്യിലെടുത്ത് വേദിയിലേക്കു കയറി. 

വിക്രത്തിന്റെ അപ്രതീക്ഷിതമായ ക്യൂട്ട് എൻട്രി മിയയ്ക്ക് സർപ്രൈസ് ആയി. "ആരെങ്കിലും ഒരു ഫോട്ടോ എടുക്കുമോ പ്ലീസ്" എന്ന മിയയുടെ നിഷ്കളങ്കമായ ചോദ്യമായിരുന്നു പിന്നീട് സദസ് കേട്ടത്. ഫൊട്ടോ സെഷനിൽ മിയയുടെ ഭർത്താവും പങ്കുചേർന്നു. 'കോബ്ര ഫാമിലി' എന്നു പറഞ്ഞുകൊണ്ടാണ് വിക്രം മിയയുടെ കുടുംബത്തെ പരിചയപ്പെടുത്തിയത്. 

ജെയിൻ സെന്റർ ഫോർ ഗ്ലോബൽ സ്റ്റഡീസും മനോരമ ഓൺലൈനും നേരിട്ട് നടത്തിയ കോബ്ര പ്രൊമോഷണൽ ഇവന്റിലാണ് മനോഹരമായ ഈ നിമിഷം പിറന്നത്. തെന്നിന്ത്യൻ പ്രേക്ഷകർ ആകാംക്ഷയോടെ കാത്തിരിക്കുന്ന ചിത്രമാണ് ‘കോബ്ര’. ആർ. അജയ് ജ്ഞാനമുത്തു സംവിധാനം ചെയ്യുന്ന ആക്‌ഷൻ ത്രില്ലർ ചിത്രത്തിൽ വ്യത്യസ്ത ഗെറ്റപ്പുകളിൽ വിക്രം പ്രത്യക്ഷപ്പെടുന്നുണ്ട്. ഓഗസ്റ്റ് 31ന് ചിത്രം റിലീസിനെത്തും.