ലണ്ടനിൽ റോഷാക്ക് വിജയാഘോഷം; അപ്രതീക്ഷിത അതിഥിയായി ബിന്ദു പണിക്കരുടെ മകൾ കല്യാണി

റോഷാക്ക് സിനിമയുടെ വിജയം ലണ്ടനിൽ ആഘോഷിച്ച് ബിന്ദു പണിക്കരുടെ മകൾ കല്യാണി. റോഷാക്കിന്റെ ലണ്ടനിലെ ആദ്യ പ്രദർശനം കാണാൻ വിമ്പിൾടൺ തിയറ്ററിൽ എത്തിയതായിരുന്നു കല്യാണി. അതേസമയം തന്നെ സിനിമയുടെ വിജയമാഘോഷിക്കാൻ ലണ്ടനിൽ പ്രവർത്തിക്കുന്ന മമ്മൂട്ടി വെൽഫെയർ അസോസിയേഷൻ ഭാരവാഹികളും തിയറ്ററിൽ ഉണ്ടായിരുന്നു.

അവിടെവച്ച് അപ്രതീക്ഷിതമായി കല്യാണിയെ കണ്ട ഭാരവാഹികൾ വിജയാഘോഷം കേക്ക് മുറിച്ച് ഉദ്ഘാടനം ചെയ്യാൻ കല്യാണിയെതന്നെ ക്ഷണിക്കുകയായിരുന്നു.

അമ്മയോടൊപ്പം ഒരുമിച്ച് കാണാൻ ആഗ്രഹിച്ചിരുന്ന സിനിമയാണ് റോഷാക്കെന്നും ഇവിടെ ഈ വിജയാഘോഷത്തിൽ പങ്കെടുക്കാൻ കഴിഞ്ഞത് യാദൃച്ഛികമായാണെന്നും കല്യാണി പറഞ്ഞു.

പ്രശസ്തമായ ലെക്കാർഡൻ ബ്ലൂ കോളജിൽ ഫ്രഞ്ച് പാചക കല പഠിക്കുകയായാണ് കല്യാണി.