‘നിങ്ങളൊരു കേഡിയോ റൗഡിയോ ആണോ..?’; ബിജു പൗലോസ് നിങ്ങളെ തേടുന്നു

‘നിങ്ങളൊരു കേഡിയോ റൗഡിയോ ആണോ..?’ ബിജു പൗലോസ് നിങ്ങളെ തേടുന്നുണ്ട്. ആശ്ചര്യപ്പെടേണ്ട, ഇതൊരു കാസ്റ്റിങ് കോൾ അറിയിപ്പാണ്. നിവിൻ പോളി–ഏബ്രിഡ് ഷൈൻ ചിത്രം ‘ആക്‌ഷൻ ഹീറോ ബിജു 2വിന്റെ വ്യത്യസ്തവും കൗതുകവും നിറഞ്ഞ കാസ്റ്റിങ് കോൾ ആണ് സമൂഹമാധ്യമങ്ങളിൽ വൈറലാകുന്നത്.  2018ല്‍ പുറത്തിറങ്ങിയ നിവിന്‍ പോളി ചിത്രമായ ആക്ഷന്‍ ഹീറോ ബിജു വന്‍ ഹിറ്റായിരുന്നു. ഏബ്രിഡ് ഷൈനിന്‍റെ സംവിധാനത്തില്‍ എത്തിയ ചിത്രത്തിലെ പാട്ടുകളും ഡയലോഗുകളും മലയാളി പ്രേക്ഷകരുടെ സംഭാഷണങ്ങളില്‍ ഇപ്പോഴും കയറിക്കൂടുന്നവയാണ്. 

ചിത്രത്തിന്‍റെ രണ്ടാം ഭാഗം വരുന്നു എന്ന വാര്‍ത്തകള്‍ കഴിഞ്ഞ വര്‍ഷം ജൂലൈയില്‍ പുറത്തുവന്നിരുന്നു. രണ്ടാം ഭാഗത്തിലേക്കുള്ള അഭിനേതാക്കളെ കണ്ടുപിടിക്കുന്ന തിരക്കിലാണ് അണിയറ പ്രവർത്തകർ. ചിത്രത്തിനായുള്ള ഒരു ഓപ്പൺ ഓഡിഷൻ നേരത്തെ സംഘടിപ്പിച്ചിരുന്നു. ഇപ്പോഴിതാ അഭിനയമികവുളള കലാകാന്മാരെ തേടി ഇവർ വീണ്ടുമെത്തുന്നു.

വെള്ളിവെളിച്ചത്തിൽ വരാതെ ഒളിച്ചു കഴിയുന്ന അഭിനയ കേഡികളെയും റൗഡികളെയും ഡീസികളെയും തിരയുന്നു. സ്വയം കണ്ടെത്തുന്നവർ ചിത്രങ്ങൾ സഹിതം ബന്ധപ്പെടുക എന്നാണ് കാസ്റ്റിങ് കോളിൽ അറിയിച്ചിരിക്കുന്നത്. അതിനു ചുവടെ ബിജു പൗലോസിന്റെ ഒപ്പും പതിപ്പിച്ചിട്ടുണ്ട്. ഇരുപതിനും അൻപതിനും ഇടയിൽ പ്രായമുള്ള സ്ത്രീകൾ ahb2castingfemale@gmail.com എന്ന മെയിൽ ഐഡിയിലും ഇരുപതിനും അൻപത്തിയഞ്ചിനും ഇടയിൽ പ്രായമുള്ള പുരുഷന്മാർ ahb2castingmale@gmail.com എന്ന മെയിൽ ഐഡിയിലുമാണ് വിവരങ്ങൾ പങ്കുവയ്ക്കേണ്ടത്.