ജയസൂര്യ ഇല്ലാതെ ‘ബ്യൂട്ടിഫുൾ’ 2 വരുന്നു

അനൂപ് മേനോന്റെ തിരക്കഥയിൽ വി.കെ. പ്രകാശ് സംവിധാനം ചെയ്ത്, ജയസൂര്യ നായകനായി അഭിനയിച്ച ‘ബ്യൂട്ടിഫുൾ’ എന്ന ചിത്രത്തിന് രണ്ടാം ഭാഗം ഒരുങ്ങുന്നു. ബ്യൂട്ടിഫുൾ 2 എന്ന് പേരിട്ടിരിക്കുന്ന ഈ ചിത്രം വി.കെ. പ്രകാശ് തന്നെ സംവിധാനം ചെയ്യുന്നു. അനൂപ് മേനോന്റേതാണ് തിരക്കഥയും. പുതിയ ചിത്രത്തിൽ ജയസൂര്യ അഭിനയിക്കുന്നില്ലെന്ന് സംവിധായകൻ വി.കെ.പ്രകാശ് വ്യക്തമാക്കി.

‘‘ബ്യൂട്ടിഫുൾ കഴിഞ്ഞ ഉടൻ തന്നെ ഞാനും അനൂപ് മേനോനും കുടി ഈ ചിത്രത്തിന്റെ രണ്ടാം ഭാഗം ആലോചിച്ചു തുടങ്ങിയിരുന്നു. ഇപ്പോഴാണ് അതിന് അവസരം വന്നു ചേർന്നത്.

ഇത്രയും ഗ്യാപ്പ് ആവശ്യവുമായിരുന്നു.’’– വി.കെ.പ്രകാശ് പറഞ്ഞു.

എൻ.എം.ബാദുഷ, ആനന്ദ്കുമാർ, റിജു രാജൻ, എന്നിവർ ബാദുഷ പ്രൊഡക്‌ഷൻസ് ആൻഡ് യെസ് സിനിമാസ് കമ്പനിയുമാണ് ഈ ചിത്രം നിർമിക്കുന്നത്. ബ്യൂട്ടിഫുള്ളിന്റെ അണിയറ പ്രവർത്തകർ തന്നെയാണ് ഈ ചിത്രത്തിന്റെ അണിയറയിലും പ്രവർത്തിക്കുന്നവർ. ജോമോൻ ടി. ജോണും, മഹേഷ് നാരായണനും തന്നെ ഛായാഗ്രഹണവും എഡിറ്റിങും നിർവഹിക്കുന്നു.സംഗീതം രതീഷ് വേഗ.

ഉണ്ണിമേനോൻ, സജിമോൻ, മുദുൽ നായർ, വിനയ് ഗോവിന്ദ്, അജയ് മങ്ങാട്, ഹസ്സൻ വണ്ടൂർ, അജിത്.വി.ശങ്കർ, ജിസ്സൻ പോൾ എന്നിവരും ഈ ചിത്രത്തിൽ പ്രവർത്തിക്കുന്നു. താരനിർണയം നടന്നു വരുന്ന സിനിമയുടെ ചിത്രീകരണം ഉടൻ തന്നെ ആരംഭിക്കും.പിആർഒ: വാഴൂർ ജോസ്.