‘തൃശൂർ എടുത്തു’: സന്തോഷം പങ്കുവച്ച് മാധവ് സുരേഷും ശ്രേയസ് മോഹനും

ലോക്സഭ തെരഞ്ഞെടുപ്പിലെ സുരേഷ് ഗോപിയുടെ വമ്പൻ വിജയത്തിൽ പ്രതികരണവുമായി മകൻ മാധവ് സുരേഷ്. ‘തൃശൂർ എടുത്തു’ എന്നായിരുന്നു സുരേഷ് ഗോപിയുടെ ലീഡ് നില വ്യക്തമാക്കുന്ന ചിത്രം പങ്കുവച്ച് മാധവ് കുറിച്ചത്.

മരുമകൻ ശ്രേയസ് മോഹനും വിജയത്തിൽ സന്തോഷം പങ്കുവച്ച് രംഗത്തെത്തി. ‘‘മാറ്റം അനിവാര്യമാണ് അതിനെ തടയാനാവില്ല.’’–ഫലമറിഞ്ഞ ശേഷം മാധ്യമങ്ങൾക്കു മുന്നിൽ പ്രതികരിക്കുന്ന സുരേഷ് ഗോപിയുടെ ചിത്രം പങ്കുവച്ച് ശ്രേയസിന്റെ വാക്കുകൾ.

അതേസമയം വിജയത്തിനു പിന്നാലെ വികാരധീനനായാണ് സുേരഷ് ഗോപി മാധ്യമങ്ങൾക്കു മുന്നിൽ സംസാരിച്ചത്. തൃശൂര്‍ ഞാനെടുത്തിട്ടില്ലെന്നും തൃശൂരുകാർ തന്നെന്നും പറഞ്ഞ സുരേഷ് ഗോപി ലൂര്‍ദ് മാതാവിന് കൊടുത്തത് അതുപോലൊരു കിരീടമായിട്ട് തൃശൂരിനെ ഞാനെന്‍റെ തലയില്‍ വയ്ക്കുമെന്നും തൃശൂരിലെ യഥാര്‍ഥ മതേതര പ്രജാദൈവങ്ങളെ വണങ്ങുന്നെന്നും പറഞ്ഞു. കേരളത്തിന്റെ എം.പിയായി പ്രവര്‍ത്തിക്കുമെന്നും അദ്ദേഹം കൂട്ടിച്ചേർത്തു.