കിങ് ഖാന്റെ പിറന്നാൾ സമ്മാനം; ‘ജവാൻ’ നവംബർ 2ന് നെറ്റ്ഫ്ലിക്സിൽ

ബോക്സ്ഓഫിസ് റെക്കോർഡുകൾ പിഴുതെറിഞ്ഞ ഷാറുഖ് ഖാൻ–അറ്റ്‌ലി ചിത്രം ‘ജവാൻ’ നവംബർ രണ്ടിന് നെറ്റ്ഫ്ലിക്സിലൂടെ സ്ട്രീമിങ് ആരംഭിക്കും. കിങ് ഖാന്റെ പിറന്നാളിനോടനുബന്ധിച്ചാണ് ചിത്രം ഒടിടി റിലീസിനെത്തുന്നത്. ബോളിവുഡിൽ പഠാനു ശേഷം ആയിരം കോടി ക്ലബ്ബിലെത്തുന്ന ഷാറുഖ് ചിത്രമാണ് ജവാൻ. 

ഷാറുഖ് ആരാധകരെ പൂർണമായും തൃപ്തിപ്പെടുത്തുന്ന രീതിയിലുള്ള മാസ് എന്റർടെയ്നറായായിരുന്നു ജവാൻ. ആസാദ് എന്ന പൊലീസ് കഥാപാത്രമായി എത്തുന്ന കിങ് ഖാൻ ഏഴ് വ്യത്യസ്ത ഗെറ്റപ്പുകളിലാണ് പ്രത്യക്ഷപ്പെടുന്നത്. അവസാന ഭാഗത്തിൽ അതിഥി താരമായി ഒരു ബോളിവുഡ് സൂപ്പർതാരവും എത്തുന്നുണ്ട്.

നർമദ റായി എന്ന പൊലീസ് ഉദ്യോഗസ്ഥയായി നയൻതാര എത്തുമ്പോൾ കാലി ഗെയ്ക്‌വാദ് എന്ന ആയുധക്കടത്തുകാരനായി വിജയ് സേതുപതി അഭിനയിക്കുന്നു. ഐശ്വര്യ റാത്തോർ എന്ന കഥാപാത്രമായി അതിഥി വേഷത്തിൽ വന്ന് ദീപികയും കയ്യടി നേടുന്നുണ്ട്. അനിരുദ്ധിന്റെ പാട്ടുകളും പശ്ചാത്തല സംഗീതവും സിനിമയുടെ മുതൽക്കൂട്ടാണ്.

റെഡ് ചില്ലീസിന്റെ ബാനറിൽ ഗൗരി ഖാനാണ് ചിത്രം നിർമിക്കുന്നത്. കാമിയോ റോളിലെത്തിയ ദീപിക പദുകോൺ തന്റെ കഥാപാത്രം ​ഗംഭീരമാക്കി. പ്രിയാമണി, സുനിൽ ​ഗ്രോവർ, സാന്യ മൽഹോത്ര, റിദ്ധി ദോ​ഗ്ര, ലെഹർ ഖാൻ, സഞ്ചീത ഭട്ടാചാര്യ തുടങ്ങിയവരും ചിത്രത്തിലെ പ്രധാന അഭിനേതാക്കളാണ്.