ബ്രിക്സിലേക്ക് 5 രാജ്യങ്ങൾ കൂടി

ന്യൂഡൽഹി ∙ ഇന്ത്യ ഉൾപ്പെടുന്ന സാമ്പത്തികസഹകരണ കൂട്ടായ്മയായ ബ്രിക്സിൽ 5 രാജ്യങ്ങൾ കൂടി സ്ഥിരാംഗങ്ങളാകും. ബ്രസീൽ, റഷ്യ, ഇന്ത്യ, ചൈന, ദക്ഷിണാഫ്രിക്ക എന്നീ രാജ്യങ്ങളാണു നിലവിൽ സ്ഥിരാംഗങ്ങൾ. പുതുവർഷദിനത്തിൽ ഈജിപ്ത്, ഇത്യോപ്യ , ഇറാൻ, സൗദി അറേബ്യ, യുഎഇ എന്നീ രാജ്യങ്ങൾ കൂടി ചേർന്നതോടെ ബ്രിക്സ് 10 അംഗ കൂട്ടായ്മയായി.

കഴിഞ്ഞ വർഷം ഓഗസ്റ്റിൽ ജൊഹാനസ്ബർഗിൽ നടന്ന ബ്രിക്സ് ഉച്ചകോടിയിൽ അർജന്റീന അടക്കം 6 രാജ്യങ്ങൾക്കു 2024 മുതൽ സ്ഥിരാംഗത്വം നൽകാൻ തീരുമാനിച്ചിരുന്നു. 

എന്നാൽ ബ്രിക്സിൽനിന്നു പിൻമാറുന്നതായി കഴിഞ്ഞ ആഴ്ച അർജന്റീനയുടെ പുതിയ പ്രസിഡന്റ് ഹവിയർ മിലേ വ്യക്തമാക്കി.

2006 ൽ ബ്രസീൽ, റഷ്യ, ഇന്ത്യ, ചൈന എന്നീ രാജ്യങ്ങൾ ചേർന്നു രൂപീകരിച്ച ബ്രിക്, 2010 ൽ ദക്ഷിണാഫ്രിക്ക കൂടി ചേർന്നതോടെയാണു ബ്രിക്സ് ആയി പുനർനാമകരണം ചെയ്തത്. അധ്യക്ഷപദവി നിലവിൽ റഷ്യക്കാണ്. 

ബഹുസ്വരതയിലും പരമാധികാര തുല്യതയിലും ഊന്നിയ ആഗോള വികസനവും സുരക്ഷയുമാണു കൂട്ടായ്മയുടെ ലക്ഷ്യമെന്നു റഷ്യ പ്രസിഡന്റ് വ്ളാഡിമിർ പുട്ടിൻ പുതിയ അംഗങ്ങളുടെ പ്രഖ്യാപനം നടത്തവേ പറഞ്ഞു.