എച്ച്ആർഡിഎസിന് എതിരെ പരാതി: അബ്ദുൽ അസീസിന്റെ മൊഴിയെടുത്തു

കോഴിക്കോട് ∙ സ്വർണക്കടത്തുകേസിലെ പ്രതി സ്വപ്ന സുരേഷിന് ജോലി നൽകിയ എച്ച്ആർഡിഎസ് ഇന്ത്യ എന്ന സ്ഥാപനത്തിനെതിരെ ഡിജിപിക്കു നൽകിയ പരാതിയിൽ ഐഎൻഎൽ കേരള സംസ്ഥാന ഓർഗനൈസിങ് സെക്രട്ടറി എൻ.കെ.അബ്ദുൽ അസീസ് മൊഴി നൽ‍കി. കഴിഞ്ഞ ജൂണിൽ നൽകിയ പരാതിയിലാണ് ഒരു ഡിവൈഎസ്പിയും രണ്ട് എസ്ഐമാരുമടങ്ങിയ സംഘം പരാതിക്കാരന്റെ മൊഴി രേഖപ്പെടുത്തിയത്. 

ആദിവാസികൾക്കുള്ള വീട് നിർമാണ പദ്ധതിയുടെ മറവിൽ വനഭൂമി  കയ്യേറി, ഗുണനിലവാരമില്ലാത്ത വീടു നിർമിച്ച് അഴിമതി നടത്തി, കരാറുകാരുമായി ഒത്തുകളിച്ച് പണം തട്ടിച്ചു, വിവിധ പദ്ധതികളുടെ തുക വകമാറ്റി ചെലവഴിച്ചു, വനമേഖലയുമായി ബന്ധപ്പെട്ട വിവിധ നിയമങ്ങൾ ലംഘിച്ചു, വന്യജീവിസംരക്ഷണ നിയമങ്ങൾ ലംഘിച്ചു, ഗൂഢമായ രാഷ്ട്രീയ ലക്ഷ്യത്തോടെ പ്രവർത്തിച്ചു,

സർക്കാരിനെയും ഭരണസംവിധാനങ്ങളെയും വിവാദങ്ങളിലേക്കു വലിച്ചിഴച്ചു എന്നിങ്ങനെ 18 കാര്യങ്ങളാണ് പരാതിയായി നൽകിയതെന്ന് അബ്ദുൽ അസീസ് പറഞ്ഞു. 53,000 കോടി രൂപയുടെ സിഎസ്ആർ ഫണ്ടുകൾ സ്വരൂപിച്ച സംഘടന ഇതുവരെ പൂർത്തീകരിച്ച പദ്ധതികളുടെ വിവരങ്ങൾ പുറത്തുവിട്ടിട്ടില്ലെന്നും അസീസ് മൊഴി നൽകി.

English Summary: N.K. Abdul Azeez give statement against HRDS India