ഡോ.കെ.എം.ചെറിയാൻ ഓർമയായി; ഹൃദയാഞ്ജലിയുമായി പ്രിയപ്പെട്ടവർ

ചെന്നൈ ∙ ഹൃദ്രോഗ വിദഗ്ധൻ ഡോ.കെ.എം.ചെറിയാനു വിട ചൊല്ലി പ്രിയപ്പെട്ടവർ. രാവിലെ 10നു ടെയ്‌ലേഴ്സ് റോഡിലെ വസതിയിൽ എത്തിച്ച മൃതദേഹം 11നു വീട്ടിലെ ശുശ്രൂഷകൾക്കു ശേഷം 12 മണിയോടെ കിൽപ്പോക്ക് സെമിത്തേരിയിൽ എത്തിച്ചാണു സംസ്കരിച്ചത്. അദ്ദേഹം ചികിത്സയിലൂടെ പുതുജീവിതം പകർന്നവർ ഉൾപ്പെടെ അന്ത്യാഞ്ജലി അർപ്പിച്ചു.

ചെറിയാൻ പടുത്തുയർത്തിയ മുഗപ്പെയർ ഫ്രൊണ്ടിയർ ലൈഫ് ലൈൻ ആശുപത്രിയിലായിരുന്നു പൊതുദർശനം. സ്ഥിരമായി ധരിച്ചിരുന്ന ഔദ്യോഗിക വേഷം, സ്റ്റെതസ്കോപ് എന്നിവ സമീപത്തു വച്ചിരുന്നു. ഗവർണർമാരായ ആർ.എൻ.രവി, പി.എസ്.ശ്രീധരൻ പിള്ള, ഗായിക സുജാത, ഭർത്താവ് ഡോ. മോഹൻ, വിവിധ ആശുപത്രികളിൽ ഒപ്പം ജോലി ചെയ്ത ഡോക്ടർമാർ, സിനിമ, സാംസ്കാരിക പ്രവർത്തകർ തുടങ്ങി ഒട്ടേറെപ്പേർ അന്ത്യാഞ്ജലി അർപ്പിക്കാനെത്തി.