കാതോലിക്കാ സ്ഥാനാരോഹണം: മന്ത്രി പി.രാജീവിന്റെ നേതൃത്വത്തിലുള്ള സംഘം ലബനനിലേക്ക്

കൊച്ചി ∙ യാക്കോബായ സഭയുടെ മലങ്കര മെത്രാപ്പൊലീത്ത ജോസഫ് മാർ ഗ്രിഗോറിയോസിന്റെ കാതോലിക്കാ സ്ഥാനാരോഹണ ചടങ്ങിൽ മന്ത്രി പി.രാജീവിന്റെ നേതൃത്വത്തിലുള്ള  സംഘം സംസ്ഥാന സർക്കാരിനെ പ്രതിനിധീകരിച്ച് പങ്കെടുക്കും. മാർച്ച് 25ന് ലബനനിലെ അച്ചാനെയിലുള്ള പാത്രിയർക്കാ അരമനയോടു ചേർന്നുള്ള സെന്റ് മേരീസ് സിറിയൻ ഓർത്തഡോക്സ് കത്തീഡ്രലിലാണ് സ്ഥാനാരോഹണ ചടങ്ങ്.

മന്ത്രി രാജീവിന്റെ നേതൃത്വത്തിലുള്ള സംഘത്തിൽ കേരള കോൺഗ്രസിനെ (ജേക്കബ്) പ്രതിനിധീകരിച്ച് പിറവം എംഎൽഎ അനൂപ് ജേക്കബ്, സിപിഐ പ്രതിനിധിയായി കൊടുങ്ങല്ലൂർ എംഎൽഎ ഇ.ടി.ടൈസൻ, കോൺഗ്രസ് പ്രതിനിധിയായി പെരുമ്പാവൂർ എംഎൽഎ എൽദോസ് കുന്നപ്പിള്ളി, കേരള കോൺഗ്രസിനെ (എം) പ്രതിനിധീകരിച്ച് ചങ്ങനാശേരി എംഎൽഎ ജോബ് മൈക്കിൾ, യാക്കോബായ സഭാ ആസ്ഥാനം നിലനിൽക്കുന്ന പുത്തൻകുരിശ് ഉൾപ്പെടുന്ന കുന്നത്തുനാട് മണ്ഡലത്തിലെ എംഎൽഎ പി.വി.ശ്രീനിജൻ, ഉദ്യോഗസ്ഥ പ്രതിനിധിയായി പ്രിൻസിപ്പൽ സെക്രട്ടറി മുഹമ്മദ് ഹനീഷ് എന്നിവരാണുള്ളത്. മാർച്ച് 25ന് നടക്കുന്ന ചടങ്ങിൽ പങ്കെടുക്കുന്നതിനായി പ്രതിനിധി സംഘം 23ന് യാത്ര പുറപ്പെട്ട് 26ന് ലബനനില്‍നിന്ന് തിരിക്കും. ചെലവ് സംസ്ഥാന സർക്കാരാണു വഹിക്കുക.

സ്ഥാനാരോഹണ ചടങ്ങുകൾക്ക് പരിശുദ്ധ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവാ മുഖ്യ കാർമികത്വം വഹിക്കും. ആകമാന സുറിയാനി ഓർത്തഡോക്സ് സഭയിലെയും യാക്കോബായ സഭയിലെയും മെത്രാപ്പൊലീത്തമാരും സഭാ ഭാരവാഹികളും പങ്കെടുക്കും. മാർച്ച് 26ന് പരിശുദ്ധ ബാവായുടെ അധ്യക്ഷതയിൽ സഭയുടെ എപ്പിസ്കോപ്പൽ സുന്നഹദോസ് ചേരും. 1994 ജനുവരി 16ന് 33-ാം വയസ്സിൽ പരിശുദ്ധ ഇഗ്നാത്തിയോസ് സഖാ പ്രഥമൻ പാത്രിയർക്കീസ് ബാവ‌ായാണ് ഡമാസ്കസിൽ കൊച്ചി ഭദ്രാസനത്തിനു വേണ്ടി ജോസഫ് മാർ ഗ്രിഗോറിയോസിനെ മെത്രാപ്പൊലീത്തയായി വാഴിച്ചത്. 18 വർഷം യാക്കോബായ സുറിയാനി സഭയുടെ എപ്പിസ്കോപ്പൽ സുന്നഹദോസ് സെക്രട്ടറിയായി പ്രവർത്തിച്ചു.

2019 ഓഗസ്റ്റ് 28നു പുത്തൻകുരിശിൽ ചേർന്ന യാക്കോബായ സുറിയാനി ക്രിസ്ത്യാനി അസോസിയേഷൻ, സഭയുടെ മെത്രാപ്പൊലീത്തൻ ട്രസ്റ്റിയായി തിരഞ്ഞെടുത്തു. പരിശുദ്ധ ഇഗ്നാത്തിയോസ് അപ്രേം ദ്വിതീയൻ പാത്രിയർക്കീസ് ബാവാ 2024 ഫെബ്രുവരി 4ന് നടത്തിയ കേരള സന്ദർശനത്തിൽ മലങ്കര മെത്രാപ്പൊലീത്തയായി പ്രഖ്യാപിച്ചു. പിന്നീട്, ശ്രേഷ്ഠ ബസേലിയോസ് തോമസ് പ്രഥമൻ കാതോലിക്കാ ബാവാ കാലം ചെയ്തതിനെ തുടർന്ന് 2024 ഡിസംബർ 8ന് പരിശുദ്ധ പാത്രിയർക്കീസ് ബാവായുടെ മലങ്കര സന്ദർശനത്തിൽ ജോസഫ് മാർ ഗ്രിഗോറിയോസ് അടുത്ത കാതോലിക്കാ ആകുമെന്ന് അറിയിച്ചിരുന്നു.