28 അഫ്ഗാൻ പൗരന്മാരെ ജർമനി നാടുകടത്തി

ബർലിൻ ∙ 28 അഫ്ഗാൻ പൗരന്മാരെ ജർമനി നാടുകടത്തി. 2021 ൽ താലിബാൻ അഫ്ഗാനിൽ അധികാരം പിടിച്ചശേഷം ആദ്യമായാണ് ഈ നടപടി. പടിഞ്ഞാറൻ ജർമനിയിലെ സുലിങ്ങൻ നഗരത്തിൽ സംഗീത പരിപാടിക്കിടെ സിറിയയിൽനിന്നുള്ള അഭയാർഥി 3 പേരെ വധിച്ച് ദിവസങ്ങൾക്കകമാണു നാടുകടത്തൽ. 

ശിക്ഷിക്കപ്പെട്ട കുറ്റവാളികളെയാണു നാടുകത്തിയതെന്നു സർക്കാർ വക്താവ് വിശദീകരിച്ചെങ്കിലും കുറ്റകൃത്യങ്ങൾ വെളിപ്പെടുത്തിയില്ല. രാജ്യത്തിന്റെ സുരക്ഷ കണക്കിലെടുത്താണ് നടപടിയെന്ന് ആഭ്യന്തരമന്ത്രി പറഞ്ഞു. ജർമനിയും താലിബാനുമായി നയതന്ത്രബന്ധമില്ല.