മഞ്ഞിൽ കുടുങ്ങിയ വിമാനയാത്രക്കാരെ രക്ഷിച്ച് റഷ്യ

മോസ്കോ ∙ റഷ്യൻ ഉപദ്വീപായ കംഛട്കയിൽ മഞ്ഞു മൂടിയ പ്രദേശത്തു 3 ദിവസം മുൻപു കാണാതായ 3 പേരെയും രക്ഷപ്പെടുത്തിയെന്നു സർക്കാർ അറിയിച്ചു. വ്യാഴാഴ്ച മിൽക്കോവയിൽ നിന്നു ഒസോറയിലേക്കു പോയ ചെറുവിമാനത്തിലെ 2 ജീവനക്കാരും ഒരു യാത്രക്കാരനുമാണ് അപകടത്തിൽ പെട്ടത്. ചരക്കുമായി പോയ വിമാനത്തിൽ മഞ്ഞടിഞ്ഞു കൂടിയതിനെ തുടർന്നു വേഗം നഷ്ടപ്പെട്ടതിനാൽ ഒരു പർവതത്തിൽ അടിയന്തര ലാൻഡിങ് നടത്തുകയായിരുന്നു. 3 പേരെയും ഹെലികോപ്റ്ററിന്റെ സഹായത്തോടെ രക്ഷപ്പെടുത്തി ആശുപത്രിയിൽ എത്തിച്ചു.