പ്രതിപക്ഷ നയപ്രഖ്യാപനമായി മുഴങ്ങി രാഹുൽ ഗാന്ധിയുടെ ശബ്ദം; ‘ഭയമല്ലെൻ സമരായുധം’

ജയ് സംവിധാൻ (ഭരണഘടന)! ഞങ്ങളിതു സംരക്ഷിച്ചു; രാജ്യം ഒറ്റക്കെട്ടായി ഭരണഘടനയെ സംരക്ഷിച്ചു. ഇപ്പോൾ ഓരോ 2–3 മിനിറ്റിലും ബിജെപി ഭരണഘടന, ഭരണഘടന എന്നു പറയുന്നതു കേൾക്കുമ്പോൾ സന്തോഷമുണ്ട്.കഴിഞ്ഞ 10 വർഷം ഇന്ത്യയെന്ന ആശയത്തിനെതിരെയും ഭരണഘടനയ്ക്കെതിരെയും ആസൂത്രിത ആക്രമണമാണു നടന്നത്. ബിജെപിയുടെ ആശയത്തെ ചെറുത്ത ലക്ഷക്കണക്കായ ജനങ്ങളും രാഷ്ട്രീയ പ്രവർത്തകരും ആക്രമിക്കപ്പെട്ടു. ഞങ്ങളിൽ ചില നേതാക്കൾ ഇപ്പോഴും ജയിലിലാണ്. പ്രധാനമന്ത്രിയുടെ ഉത്തരവിന്റെ അടിസ്ഥാനത്തിൽ ഞാനും അതിക്രമത്തിന് ഇരയായി. ഇരുപതിലേറെ കേസുകൾ, 2 വർഷം തടവുശിക്ഷ, വീടുപോലും എന്നിൽ നിന്നെടുത്തു. 55 മണിക്കൂർ ഇ.ഡിയുടെ ചോദ്യം ചെയ്യൽ. ഒടുവിൽ, ക്യാമറ ഓഫ് ചെയ്തശേഷം അന്വേഷണ ഉദ്യോഗസ്ഥൻ എന്നോടു ചോദിച്ചു: ‘താങ്കൾ പാറപോലെയാണ്, കുലുക്കമില്ലല്ലോ!’