Ranji Trophy

ഡർബനിൽ തകർത്തടിച്ച് സഞ്ജു, ഇങ്ങകലെ തുമ്പയിൽ കേരളവും; രഞ്ജി ട്രോഫിയിൽ ഉത്തർപ്രദേശിനെതിരെ ഇന്നിങ്സ് ജയം

തിരുവനന്തപുരം∙ ദക്ഷിണാഫ്രിക്കയ്‌ക്കെതിരെ ഡർബനിലെ കിങ്സ്മീഡ് ക്രിക്കറ്റ് സ്റ്റേഡിയത്തിൽ തകർത്തടിച്ച് സഞ്ജു സാംസൺ ടീം ഇന്ത്യയ്ക്ക് തകർപ്പൻ വിജയം സമ്മാനിച്ചതിന്റെ അലയൊലികൾ അടങ്ങും മുൻപേ, ഇങ്ങകലെ തുമ്പയിലെ സെന്റ് സേവ്യേഴ്സ് കെസിഎ ക്രിക്കറ്റ് സ്റ്റേഡിയത്തിലെ രഞ്ജി ട്രോഫി മത്സരത്തിൽ സഞ്ജുവിന്റെ അഭാവത്തിലും വിജയം കൊയ്ത് കേരളം. ഉത്തർപ്രദേശിനെതിരായ ര‍‍ഞ്ജി ട്രോഫി മത്സരത്തിൽ ഇന്നിങ്സിനും 117 റൺസിനുമാണ് കേരളത്തിന്റെ വിജയം. 233 റൺസിന്റെ ഒന്നാം ഇന്നിങ്സ് കടവുമായി രണ്ടാം ഇന്നിങ്സ് ആരംഭിച്ച ഉത്തർപ്രദേശ്, അവസാന ദിനം ആദ്യ സെഷനിൽത്തന്നെ 37.5 ഓവറിൽ 116 റൺസിന് പുറത്തായി.

തുടർച്ചയായ രണ്ടാം ഇന്നിങ്സിലും 10 വിക്കറ്റ് നേട്ടം കൈവരിച്ച ജലജ് സക്സേനയാണ് കേരളത്തിന് തകർപ്പൻ വിജയം സമ്മാനിച്ചത്. മത്സരത്തിലാകെ സക്സേന 11 വിക്കറ്റ് വീഴ്ത്തി. ഇന്നിങ്സ് വിജയത്തോടെ കേരളത്തിന് ബോണസ് പോയിന്റും ലഭിക്കും. ഇനി നവംബർ 13 മുതൽ കരുത്തരായ ഹരിയാനയ്‌ക്കെതിരെയാണ് കേരളത്തിന്റെ അടുത്ത മത്സരം.

233 റൺസിന്റെ ഒന്നാം ഇന്നിങ്സ് ലീഡ് വഴങ്ങി ബാറ്റിങ്ങിന് ഇറങ്ങിയ ഉത്തർപ്രദേശിന്, കേരളത്തിന്റെ സ്പിൻ ആക്രമണത്തെ ചെറുത്തുനിൽക്കാനായില്ല. 78 പന്തിൽ നാലു ഫോറുകൾ സഹിതം 36 റൺസെടുത്ത മാധവ് കൗശിക്കാണ് അവരുടെ ടോപ് സ്കോറർ. ക്യാപ്റ്റൻ കൂടിയായ ഓപ്പണർ ആര്യൻ ജുയൽ (24 പന്തിൽ ഒരു ഫോർ സഹിതം 12), പ്രിയം ഗാർഗ് (24 പന്തിൽ രണ്ടു ഫോറും ഒരു സിക്സും സഹിതം 22), നിതീഷ് റാണ (28 പന്തിൽ രണ്ടു ഫോറുകൾ സഹിതം 15), സിദ്ധാർഥ് യാദവ് (31 പന്തിൽ രണ്ടു ഫോറുകളോടെ പുറത്താകാതെ 14), ആക്വിബ് ഖാൻ (9 പന്തിൽ ഓരോ സിക്സും ഫോറും സഹിതം 11) എന്നിവരാണ് രണ്ടക്കത്തിലെത്തിയത്.

ഒരു ഘട്ടത്തിൽ രണ്ടിന് 84 റൺസ് എന്ന നിലയിലായിരുന്ന ഉത്തർപ്രദേശിന്, വെറും 32 റൺസിനിടെയാണ് അവസാന എട്ടു വിക്കറ്റുകൾ നഷ്ടമായത്. സമീർ റിസ്‌വി (ആറു പന്തിൽ 0), സൗരഭ് കുമാർ (12 പന്തിൽ 3), പിയൂഷ് ചൗള (നാലു പന്തിൽ ഒന്ന്), ശിവം മാവി (മൂന്നു പന്തിൽ 0), ശിവം ശർമ (എട്ടു പന്തിൽ ഒന്ന്) എന്നിവരെല്ലാം കൂട്ടത്തോടെ നിരാശപ്പെടുത്തി. ഉത്തർപ്രദേശിന് നഷ്ടമായ 10 വിക്കറ്റുകളിൽ ഒൻപതും കേരളത്തിന്റെ ജലജ് സക്സേന – ആദിത്യ സർവതെ സ്പിൻ ദ്വയം പങ്കിട്ടു. സക്സേന 16.5 ഓവറിൽ 41 റൺസ് വഴങ്ങി ആറു വിക്കറ്റെടുത്തു. സർവതെ ഏഴ് ഓവറിൽ 15 റൺസ് മാത്രം വഴങ്ങി മൂന്നു വിക്കറ്റും സ്വന്തമാക്കി. ഒരു വിക്കറ്റ് കെ.എം. ആസിഫിനാണ്. ജലജ് സക്സേന ഒന്നാം ഇന്നിങ്സിൽ 17 ഓവറിൽ 56 റൺസ് വഴങ്ങിയാണ് 5 വിക്കറ്റെടുത്തത്.

∙ കേരളത്തിന് സൽമാനുണ്ട്, ബാക്കി ‘നിസാരം’!

നേരത്തേ, ഉത്തർപ്രദേശിന്റെ ഒന്നാം ഇന്നിങ്സ് സ്കോറായ 162 റൺസ് പിന്തുടർന്ന് ബാറ്റിങ്ങിന് ഇറങ്ങിയ കേരളം മൂന്നാം ദിനം ആദ്യ സെഷനിൽ 395 റൺസിന് ഓൾഔട്ടായിരുന്നു. 124.1 ഓവറിലാണ് കേരളം 395 റൺസെടുത്തത്. കേരള നിരയിൽ സൽമാൻ നിസാർ സെഞ്ചറിക്ക് അരികെ പുറത്തായത് നിരാശയായി. 202 പന്തിൽ ഒൻപതു ഫോറും മൂന്നു സിക്സും സഹിതം 93 റൺസെടുത്ത സൽമാൻ, പത്താമനായാണ് പുറത്തായത്.

കേരളത്തിനായി ക്യാപ്റ്റൻ സച്ചിൻ ബേബിയും അർധസെഞ്ചറി നേടി. 165 പന്തുകൾ നേരിട്ട സച്ചിൻ, എട്ടു ഫോറുകളോടെ 83 റൺസെടുത്തു. നാല് അർധസെഞ്ചറി കൂട്ടുകെട്ടുകളും കേരള ഇന്നിങ്സിൽ നിർണായകമായി. അഞ്ചാം വിക്കറ്റിൽ അക്ഷയ് ചന്ദ്രൻ – സച്ചിൻ ബേബി (142 പന്തിൽ 63), ആറാം വിക്കറ്റിൽ സച്ചിൻ ബേബി – സൽമാൻ നിസാർ (187 പന്തിൽ 99), ഏഴാം വിക്കറ്റിൽ ജലജ് സക്സേന – സൽമാൻ നിസാർ (118 പന്തിൽ 59), എട്ടാം വിക്കറ്റിൽ സൽമാൻ നിസാർ – മുഹമ്മജ് അസ്ഹറുദ്ദീൻ (92 പന്തിൽ 55) എന്നിവരാണ് അർധസെഞ്ചറി കൂട്ടുകെട്ടുകൾ തീർത്തത്.

ഓപ്പണർമാരായ വത്സൽ ഗോവിന്ദ് (62 പന്തിൽ രണ്ടു ഫോറുകളോടെ 23), രോഹൻ എസ്.കുന്നുമ്മൽ (38 പന്തിൽ നാലു ഫോറുകളോടെ 28), ബാബ അപരാജിത് (44 പന്തിൽ അഞ്ച് ഫോറും ഒരു സിക്സും സഹിതം 32), അക്ഷയ് ചന്ദ്രൻ (70 പന്തിൽ ഒരു ഫോർ സഹിതം 24), ജലജ് സക്സേന (77 പന്തിൽ രണ്ടു ഫോറുകളോടെ 35), മുഹമ്മദ് അസ്ഹറുദ്ദീൻ (43 പന്തിൽ അഞ്ച് ഫോറും ഒരു സിക്സും സഹിതം 40), ആദിത്യ സർവതെ (40 പന്തിൽ രണ്ടു ഫോറുകളോടെ 14) എന്നിവരെല്ലാം കേരള ഇന്നിങ്സിൽ ഭേദപ്പെട്ട സംഭാവനകൾ നൽകി. ഉത്തർപ്രദേശിനായി ആക്വിബ് ഖാൻ 18.1 ഓവറിൽ 61 റൺസ് വഴങ്ങി മൂന്നു വിക്കറ്റ് വീഴ്ത്തി. ശിവം മാവി, സൗരഭ് കുമാർ, ശിവം ശർമ എന്നിവർ രണ്ടു വിക്കറ്റ് വീതം സ്വന്തമാക്കി. ശേഷിക്കുന്ന വിക്കറ്റ് പിയൂഷ് ചൗള സ്വന്തമാക്കി.

ഒന്നാം ഇന്നിങ്സിൽ അഞ്ച് വിക്കറ്റ് വീഴ്ത്തിയ ജലജ് സക്സേനയുടെ നേതൃത്വത്തിലാണ് കേരളം ഉത്തർപ്രദേശിനെ 162 റൺസിൽ ഒതുക്കിയത്. 60.2 ഓവറിലാണ് ഉത്തർപ്രദേശ് 162 റൺസെടുത്തത്. പത്താമനായി ഇറങ്ങി 50 പന്തിൽ രണ്ടുവീതം സിക്സും ഫോറും സഹിതം 30 റൺസെടുത്ത ശിവം ശർമയാണ് അവരുടെ ടോപ് സ്കോറർ. 17 ഓവറിൽ 56 റൺസ് വഴങ്ങിയാണ് സക്സേന അഞ്ച് വിക്കറ്റ് വീഴ്ത്തിയത്. ബേസിൽ തമ്പി രണ്ടും ആദിത്യ സർവതെ, കെ.എം. ആസിഫ്, ബാബ അപരാജിത് എന്നിവർ ഓരോ വിക്കറ്റും വീഴ്ത്തി.