വെട്ടാൻ വന്ന പോത്തിന് കൈക്കരുത്ത് മറുപടി; യുവതിയുടെ ജീവൻ രക്ഷിക്കാൻ പോത്തിനെ കൊമ്പിൽ പിടിച്ചുനിർത്തി അച്ചാമ്മ

ആലുവ ∙ വെട്ടാൻ വന്ന പോത്തിനെ ഏറെനേരം കൊമ്പിൽ പിടിച്ചുനിർത്തി യുവതിയുടെ ജീവൻ രക്ഷിച്ച അച്ചാമ്മ സ്റ്റീഫനു നാട്ടുകാരുടെ അഭിനന്ദന പ്രവാഹം. ചുണങ്ങംവേലി രാജഗിരി ആശുപത്രി ജീവനക്കാരിയായ ഇരുപത്തൊന്നുകാരി പാടത്തിനു നടുവിലെ റോഡിലൂടെ താമസസ്ഥലത്തേക്കു പോകുമ്പോഴാണ് പോത്ത് വെട്ടാൻ ഓടിച്ചത്. മഹിളാ കോൺഗ്രസ് കീഴ്മാട് മണ്ഡലം പ്രസിഡന്റും പഞ്ചായത്ത് മുൻ അംഗവുമായ അച്ചാമ്മ സ്റ്റീഫന്റെ വീടിന്റെ മുകൾ നിലയിലാണ് യുവതി താമസിക്കുന്നത്.

യുവതിയുടെ കരച്ചിൽ കേട്ടെത്തിയ അച്ചാമ്മ സ്വജീവൻ അപകടത്തിലാകുമെന്ന ചിന്ത മാറ്റിവച്ചു പോത്തിനെ പിടിച്ചു നിർത്തുകയായിരുന്നു. ഇതിനിടെ നാട്ടുകാർ ഓടിക്കൂടിയെങ്കിലും പോത്ത് കുതറിക്കൊണ്ടു നിന്നതിനാൽ ആരും അടുത്തില്ല. യാദൃച്ഛികമായി എത്തിയ തമിഴ്നാട്ടുകാരനാണ് ഒടുവിൽ പോത്തിനെ കീഴ്പ്പെടുത്തി തളച്ചത്. കൈകൾക്കു പരുക്കേറ്റ അച്ചാമ്മ സ്വകാര്യ ആശുപത്രിയിൽ ചികിത്സ തേടി. ഇതേ പോത്ത് മുൻപും ആളുകളെ ആക്രമിച്ചിട്ടുണ്ടെന്നു നാട്ടുകാർ പറഞ്ഞു.