ട്രംപിന്റെ രണ്ടാം വരവ്; അംഗീകാര റേറ്റിങ്ങിൽ നേരിയ വർധനവ്, സമ്പദ്‌വ്യവസ്ഥയിൽ അതൃപ്തി

ഹൂസ്റ്റൺ∙  ഡോണൾഡ് ട്രംപ് യുഎസ് പ്രസിഡന്റ് സ്ഥാനത്ത് രണ്ടാം വട്ടം എത്തിയ ശേഷം ഒരു മാസം പിന്നിട്ടു. ഒട്ടറെ എക്സിക്യൂട്ടീവ് ഓർഡറുകളും വിവാദങ്ങളും ഈ കാലയളവിനെ സംഭവബഹുലമാക്കി. എൻബിസി ന്യൂസ് നടത്തിയ പുതിയ വോട്ടെടുപ്പ് പ്രകാരം ട്രംപിന്റെ അംഗീകാര റേറ്റിങ് 47 ശതമാനമാണ്. പ്രസിഡന്റ് എന്ന നിലയിൽ അദ്ദേഹത്തിന്റെ എക്കാലത്തെയും മികച്ച റേറ്റിങ്ങാണിത്. എന്നാൽ 51 ശതമാനം പേർ അദ്ദേഹത്തിന്റെ പ്രകടനത്തെ അംഗീകരിക്കുന്നില്ല.

വോട്ടർമാർക്ക് സമ്പദ്‌വ്യവസ്ഥയെക്കുറിച്ച് മതിപ്പില്ല. 18 ശതമാനം പേർ മാത്രമാണ് സമ്പദ്‌വ്യവസ്ഥയെ 'മികച്ചത്' അല്ലെങ്കിൽ 'നല്ലത്' എന്ന് റേറ്റ് ചെയ്യുന്നത്. 43 ശതമാനം പേർ  'മോശം' ആണെന്ന് പറയുന്നു. ട്രംപ് സമ്പദ്‌വ്യവസ്ഥ കൈകാര്യം ചെയ്യുന്ന രീതിയെ 44 ശതമാനം പേർ അംഗീകരിക്കുമ്പോൾ 54 ശതമാനം പേർ അംഗീകരിക്കുന്നില്ല. പണപ്പെരുപ്പവും ജീവിതച്ചെലവും സംബന്ധിച്ച് 55 ശതമാനം പേർ അംഗീകരിക്കുന്നില്ല. 42 ശതമാനം പേർ മാത്രമാണ് അദ്ദേഹത്തിന്റെ ശ്രമങ്ങളെ അംഗീകരിക്കുന്നത്.

സ്വതന്ത്ര വോട്ടർമാരിൽ ട്രംപിന്റെ അംഗീകാര റേറ്റിങ് താഴ്ന്ന നിലയിലാണ്. 30 ശതമാനം പേർ അദ്ദേഹത്തിന്റെ പ്രകടനത്തെ അംഗീകരിക്കുമ്പോൾ 67 ശതമാനം പേർ അംഗീകരിക്കുന്നില്ല. ലിംഗവിഭജനവും വ്യക്തമാണ്. 55 ശതമാനം പുരുഷന്മാർ ട്രംപിനെ അംഗീകരിക്കുമ്പോൾ 58 ശതമാനം സ്ത്രീകൾ അംഗീകരിക്കുന്നില്ല.

∙ കുടിയേറ്റത്തിൽ കർക്കശക്കാരൻ
ട്രംപിന്റെ ഏറ്റവും ഉയർന്ന അംഗീകാരം അതിർത്തി സുരക്ഷയിലും കുടിയേറ്റത്തിലുമാണ്. അവിടെ 55 ശതമാനം വോട്ടർമാർ അദ്ദേഹത്തെ അംഗീകരിക്കുന്നു. 43 ശതമാനം പേർ അംഗീകരിക്കുന്നില്ല. കുടിയേറ്റ നയത്തിൽ അദ്ദേഹം 'ശരിയായ മാറ്റം' കൊണ്ടുവരുന്നുവെന്ന് 56 ശതമാനം പേർ വിശ്വസിക്കുന്നു.

വിദേശനയത്തിൽ 45 ശതമാനം പേർ അംഗീകരിക്കുന്നു. 53 ശതമാനം പേർ ട്രംപിന്റെ രാജ്യാന്തര കാര്യങ്ങൾ കൈകാര്യം ചെയ്യുന്നതിനെ അംഗീകരിക്കുന്നില്ല. റഷ്യ-യുക്രെയ്ൻ യുദ്ധത്തോടുള്ള അദ്ദേഹത്തിന്റെ സമീപനവും ഭിന്നിപ്പിക്കുന്നതാണ്. 42 ശതമാനം പേർ അംഗീകരിക്കുമ്പോൾ 55 ശതമാനം പേർ വിയോജിക്കുന്നു.

60 ശതമാനം വോട്ടർമാർ തങ്ങളുടെ കുടുംബത്തിന്റെ വരുമാനം ജീവിതച്ചെലവിന് പിന്നിലാണെന്ന് പറയുന്നു. 32 ശതമാനം പേർ അത് നിലനിർത്തുന്നുണ്ടെന്നും 7 ശതമാനം പേർ വരുമാനം ഉയരുന്നുണ്ടെന്നും വോട്ടെടുപ്പ് വെളിപ്പെടുത്തുന്നു. ട്രംപ് പണപ്പെരുപ്പം കൈകാര്യം ചെയ്യുന്നതിൽ 55 ശതമാനം വോട്ടർമാർ അതൃപ്തരാണ്. 46 ശതമാനം പേർ 'ഒട്ടും തൃപ്തരല്ല'. 23 ശതമാനം പേർ മാത്രമാണ് 'വളരെ സംതൃപ്തർ'.

∙ മാറ്റത്തിന്റെ കാറ്റ്
ട്രംപ് ശരിയായ തരത്തിലുള്ള മാറ്റം കൊണ്ടുവരുന്നുണ്ടോ എന്ന് ചോദിച്ചപ്പോൾ 46 ശതമാനം പേർ സമ്മതിക്കുന്നു. 30 ശതമാനം പേർ തെറ്റായ മാറ്റം കൊണ്ടുവരുന്നുവെന്ന് പറയുന്നു. 21 ശതമാനം പേർ മാറ്റം കൊണ്ടുവരുന്നില്ലെന്നും പറയുന്നു. പണപ്പെരുപ്പത്തെക്കുറിച്ച് 40 ശതമാനം പേർ ശരിയായ മാറ്റങ്ങൾ വരുത്തുന്നുണ്ടെന്ന് പറയുന്നു. 30 ശതമാനം പേർ തെറ്റായ മാറ്റങ്ങൾ വരുത്തുന്നുണ്ടെന്ന് പറയുന്നു. വ്യാപാര, താരിഫ് എന്നിവയിൽ 41 ശതമാനം പേർ ട്രംപിന്റെ മാറ്റങ്ങളെ അംഗീകരിക്കുന്നു. 38 ശതമാനം പേർ തെറ്റായ മാറ്റം കൊണ്ടുവരുന്നുവെന്ന് പറയുന്നു. 18 ശതമാനം പേർ മാറ്റങ്ങൾ വരുത്തുന്നില്ലെന്നും വിശ്വസിക്കുന്നു.

∙ ഇടിഞ്ഞ് ഡെമോക്രാറ്റുകൾ
റജിസ്റ്റർ ചെയ്ത ഡെമോക്രാറ്റുകളിൽ 27 ശതമാനം പേർ മാത്രമാണ് സ്വന്തം പാർട്ടിയെക്കുറിച്ച് പോസിറ്റീവ് വീക്ഷണമുള്ളവർ. 7 ശതമാനം പേർ മാത്രമാണ് അത് 'വളരെ' പോസിറ്റീവ് ആണെന്ന് പറയുന്നത്. ഇതിനു വിപരീതമായി 55 ശതമാനം ഡെമോക്രാറ്റിക് വോട്ടർമാർ പാർട്ടിയെക്കുറിച്ച് നെഗറ്റീവ് വീക്ഷണം പുലർത്തുന്നു. 38 ശതമാനം പേർ അതിനെ 'വളരെ' നെഗറ്റീവ് എന്ന് വിശേഷിപ്പിക്കുന്നു.

ഡെമോക്രാറ്റിക് പാർട്ടി ഭിന്നിച്ചിരിക്കുന്ന അവസ്ഥയിലാണ്. 65 ശതമാനം ഡെമോക്രാറ്റുകളും കോൺഗ്രസ് അംഗങ്ങൾ അവരുടെ നിലപാടുകളിൽ ഉറച്ചുനിൽക്കണമെന്ന് ആഗ്രഹിക്കുന്നു. ട്രംപുമായുള്ള നിയമനിർമാണ വിട്ടുവീഴ്ചകളെ 32 ശതമാനം പേർ മാത്രമാണ് അനുകൂലിക്കുന്നത്.

2026ലെ ഇടക്കാല തിരഞ്ഞെടുപ്പിൽ പലരും തീരുമാനം എടുത്തിട്ടില്ല. 48 ശതമാനം വോട്ടർമാർ കോൺഗ്രസിന്റെ ഡെമോക്രാറ്റിക് നിയന്ത്രണത്തെ അനുകൂലിക്കുമ്പോൾ 47 ശതമാനം പേർ റിപ്പബ്ലിക്കൻ നിയന്ത്രണത്തെ അനുകൂലിക്കുന്നു. 5 ശതമാനം പേർ തീരുമാനമെടുത്തിട്ടില്ല.

കോൺഗ്രസ് ട്രംപിനെ എങ്ങനെ കൈകാര്യം ചെയ്യുന്നു എന്നതിനെക്കുറിച്ചും വോട്ടർമാർ ഭിന്നിച്ചിരിക്കുന്നു. റിപ്പബ്ലിക്കൻമാർ വളരെയധികം പിന്തുണച്ചിട്ടുണ്ടെന്ന് 53 ശതമാനം പേർ വിശ്വസിക്കുന്നു. ഡെമോക്രാറ്റുകൾ വിമർശനാത്മകമാണെന്ന് 50 ശതമാനം പേർ പറയുന്നു. റിപ്പബ്ലിക്കൻമാർക്ക് 30 ശതമാനം അംഗീകാരം ലഭിച്ചപ്പോൾ റിപ്പബ്ലിക്കൻമാർ ട്രംപിനെ എങ്ങനെ കൈകാര്യം ചെയ്യുന്നുവെന്ന് 39 ശതമാനം പേർ അംഗീകരിക്കുന്നു.

∙ ഡോഗിന്റെയും മസ്‌കിന്റെയും ജനപ്രീതി
ഫെഡറൽ ഗവൺമെന്റ് മാറ്റങ്ങളിൽ ഡോഗിന്റെ സ്വാധീനത്തെക്കുറിച്ചുള്ള അഭിപ്രായങ്ങളും പോൾ അളന്നു. 46 ശതമാനം പേർ ഇത് നല്ല ആശയമാണെന്ന് വിശ്വസിക്കുന്നു. 40 ശതമാനം പേർ മോശമാണെന്ന് പറയുന്നു. 41 ശതമാനം പേർ ഡോഗെയെ കുറിച്ച് പോസിറ്റീവ് വീക്ഷണം പുലർത്തുന്നു. 47 ശതമാനം പേർ നെഗറ്റീവ് വീക്ഷണം പുലർത്തുന്നു. ഇലോൺ മസ്‌ക് ജനപ്രീതിയില്ലാത്തവനായി തുടരുന്നു. 51 ശതമാനം പേർക്ക് അദ്ദേഹത്തെക്കുറിച്ച് നെഗറ്റീവ് വീക്ഷണവും 39 ശതമാനം പേർ പോസിറ്റീവും ആണ്.

ഡോഗെയ്ക്ക് കീഴിലുള്ള ഫെഡറൽ ചെലവ് കുറയ്ക്കലിനെക്കുറിച്ച് വോട്ടർമാർ ഭിന്നിച്ച നിലയിലാണ്. 33 ശതമാനം പേർ ഇതിനെ അശ്രദ്ധമായ നടപടികളെന്ന് പറയുന്നു. 28 ശതമാനം പേർ മന്ദഗതിയിലാക്കണമെന്ന് പറയുന്നു. 33 ശതമാനം പേർ കൂടുതൽ വെട്ടിച്ചുരുക്കലുകൾ ആവശ്യമാണെന്ന് വിശ്വസിക്കുന്നു. ഫെഡറൽ ആനുകൂല്യങ്ങളിലും സേവനങ്ങളിലും വരുത്തിയ കുറവുകൾ തങ്ങളെയോ തങ്ങൾക്ക് അറിയാവുന്ന ഒരാളെയോ പ്രതികൂലമായി ബാധിച്ചിട്ടുണ്ടെന്ന് 27 ശതമാനം പേർ പറയുന്നു.

മാർച്ച് 7 മുതൽ 11 വരെ ടെലിഫോൺ അഭിമുഖങ്ങളിലൂടെയും ഓൺലൈൻ സർവേകളിലൂടെയും എൻബിസി ന്യൂസ് പോൾ 1,000 റജിസ്റ്റർ ചെയ്ത വോട്ടർമാരാണ് സർവേയിൽ പങ്കെടുത്തത്.