ചിത്രയുടെ സ്വരമാധുരിയിൽ ‘മുറ്റത്തെ മുല്ല’; മനോഹര മെലഡി ഏറ്റെടുത്ത് പ്രേക്ഷകർ

ജവാനും മുല്ലപ്പൂവും എന്ന ചിത്രത്തിനു വേണ്ടി ഗായിക കെ.എസ്.ചിത്ര ആലപിച്ച പുതിയ ഗാനം ആസ്വാദകശ്രദ്ധ നേടുന്നു. ‘മുറ്റത്തെ മുല്ല’ എന്നു തുടങ്ങുന്ന വിഡിയോ ഗാനമാണ് അണിയറപ്രവർത്തകർ പുറത്തിറക്കിയത്. ബി.കെ.ഹരിനാരായണൻ വരികൾ കുറിച്ച പാട്ടിന് 4 മ്യൂസിക്സ് ഈണമൊരുക്കിയിരിക്കുന്നു. 

ചിത്രയുടെ അതിമനോഹര ആലാപനത്തിലൂടെ ശ്രദ്ധേയമായ ഗാനത്തിനു മികച്ച പ്രേക്ഷകസ്വീകാര്യതയാണു ലഭിക്കുന്നത്. പാട്ട് ഇതിനകം ട്രെൻഡിങ്ങിൽ ഇടം പിടിച്ചുകഴിഞ്ഞു. കുടുംബ ബന്ധത്തിന്റെ ഇഴയടുപ്പവും സാമൂഹ്യജീവിത സാഹചര്യങ്ങളും പാട്ടിൽ വരച്ചിട്ടിരിക്കുന്നു. 

രഘു മേനോൻ സംവിധാനം ചെയ്യുന്ന ചിത്രമാണ് ‘ജവാനും മുല്ലപ്പൂവും’. ശിവദ, സുമേഷ് ചന്ദ്രൻ, രാഹുൽ മാധവ്, ദേവി അജിത്, കവിത രഘുനന്ദൻ, ലത ദാസ് എന്നിവർ പ്രധാന വേഷങ്ങളിലെത്തുന്നു. സുരേഷ് കൃഷ്ണർ ആണ് ചിത്രത്തിന്റെ രചന നിർവഹിച്ചിരിക്കുന്നത്.