സത്യപാലിനെതിരെ സിബിഐയെ അഴിച്ചുവിട്ടു; ആരോപണങ്ങൾക്ക് മോദി മറുപടി പറയണം: യച്ചൂരി

ന്യൂഡൽഹി ∙ ജമ്മു കശ്മീർ മുൻ ഗവർണർ സത്യപാൽ മാലിക്കിനെ സിബിഐ ചോദ്യംചെയ്യുന്നത് വിമർശിച്ച് സിപിഎം. ജനാധിപത്യത്തിനുനേരെയുള്ള നികൃഷ്ടമായ കടന്നാക്രമണമെന്ന് സിപിഎം ജനറൽ സെക്രട്ടറി സീതാറാം യച്ചൂരി പറഞ്ഞു. സത്യപാൽ മാലിക് ഉന്നയിച്ച ആരോപണങ്ങൾക്ക് മോദി മറുപടി പറയണം. സത്യപാലിനെതിരെ സിബിഐയെ അഴിച്ചുവിട്ടെന്നും യച്ചൂരി ട്വീറ്റ് ചെയ്തു.

Read more on: 300 കോടി കൈക്കൂലി വാഗ്ദാനം: മുൻ ഗവർണർ സത്യപാൽ മാലിക്കിനെ സിബിഐ ചോദ്യം ചെയ്യും

റിലയൻസ് ഇൻഷുറൻസ് പദ്ധതിയുമായി ബന്ധപ്പെട്ട് വെളിപ്പെടുത്തലിന് പിന്നാലെയാണ് സത്യപാൽ മാലിക്കിനെ സിബിഐ ചോദ്യംചെയ്യാൻ ഒരുങ്ങുന്നത്. ഈ മാസം 28ന് ഡൽഹി സിബിഐ ആസ്ഥാനത്ത് ഹാജരാകാൻ നിർദേശം നൽകിയിട്ടുണ്ട്. കശ്മീർ ഗവർണറായിരിക്കെ 2 പദ്ധതികൾ പാസാക്കാൻ വന്നുവെന്നും അതിലൊന്ന് അംബാനിയുടേതും മറ്റേതു പ്രധാനമന്ത്രിയുമായി അടുപ്പമുള്ള ആർഎസ്എസ് നേതാവ് റാംമാധവിന്റേതുമാണെന്നാണ് സത്യപാൽ മാലിക്ക് വെളിപ്പെടുത്തിയത്. പദ്ധതികളിൽ കുഴപ്പങ്ങളും അഴിമതി സാധ്യതകളും കണ്ടതോടെ രണ്ടും റദ്ദാക്കാൻ നിർദേശിച്ചു. അവ ഒപ്പിട്ടാൽ 300 കോടി രൂപ കൈക്കൂലി കിട്ടുമെന്നു ചില ഉദ്യോഗസ്ഥർ സൂചിപ്പിച്ചതായും ഗവർണർ പറഞ്ഞിരുന്നു.

English Summary: CBI notice to Satyapal Malik; Sitaram Yechury against Central Government