‘സ്ഥിരം മത്സരിക്കുന്ന ഞങ്ങളൊക്കെ മാറി പുതിയ സെറ്റപ്പ് വരണം; പ്രതിപക്ഷ നേതാവിനെ തീരുമാനം അറിയിച്ചു’

കോഴിക്കോട്∙ തിരഞ്ഞെടുപ്പിൽ മത്സരിക്കാൻ കോൺഗ്രസ് സജ്ജമെന്ന് മുതിർന്ന കോൺഗ്രസ് നേതാവ് കെ. മുരളീധരൻ. പാലക്കാട് ഉറപ്പായും വിജയിക്കും. ചേലക്കരയിൽ മാറ്റമുണ്ടാകുമെന്നാണ് പ്രതീക്ഷ. പാലക്കാട് വിജയിക്കുമെന്ന കാര്യത്തിൽ ഒരു ശതമാനം പോലും സംശയമില്ല. സ്ഥാനാർഥി നിർണയത്തെ പറ്റി പ്രതിപക്ഷ നേതാവ് വിളിച്ച് സംസാരിച്ചിരുന്നു. ഏകദേശ തീരുമാനം അറിയിച്ചു. അത് താൻ സ്വാഗതം ചെയ്തുവെന്നും മുരളീധരൻ പറഞ്ഞു.

‘‘അടുത്ത നിയമസഭാ തിരഞ്ഞെടുപ്പിൽ സ്ഥിരം മത്സരിക്കുന്ന ഞങ്ങളൊക്കെ മാറി പുതിയൊരു സെറ്റപ്പ് വരണം. പുതുതായി വരുന്ന ചെറുപ്പക്കാരെ സ്ഥാനാർഥിയാക്കണം. അടുത്ത ലോക്സഭാ തിരഞ്ഞെടുപ്പിൽ ആരോഗ്യം അനുവദിച്ചാൽ മാത്രം തന്നെ പരിഗണിച്ചാൽ മതിയെന്ന് നേതൃത്വത്തെ ഇന്ന് അറിയിച്ചു. 2029 വരെ തിരഞ്ഞെടുപ്പിന് അവധി നൽകിയിരിക്കുകയാണ്’’ – മുരളീധരൻ പറഞ്ഞു.