തടി പെട്ടെന്ന് കുറയ്ക്കണോ? ഗ്രീൻ ടീ കുടിക്കേണ്ടത് ഇങ്ങനെ!

എണ്ണമറ്റ ആരോഗ്യഗുണങ്ങള്‍ നിറഞ്ഞ പാനീയമാണ് ഗ്രീന്‍ ടീ. ആന്‍റി ഓക്സിഡന്റുകളും പോളിഫിനോളുകളുമെല്ലാം അടങ്ങിയ  ഈ പാനീയം സീറോ കലോറി ആയതിനാല്‍ ഭാരം കുറയ്ക്കാന്‍ ആഗ്രഹിക്കുന്നവര്‍ക്ക് മികച്ച ഓപ്ഷനാണ്. ഉപാപചയ പ്രവർത്തനം വർധിപ്പിക്കാനും കൂടുതൽ കൊഴുപ്പിനെ കത്തിച്ചു കളയാനുള്ള ശരീരത്തിന്റെ കഴിവ് വർധിപ്പിക്കാനും ഭക്ഷണത്തോടുള്ള ആസക്തി കുറയ്ക്കാനും വയർ നിറഞ്ഞ തോന്നൽ ഉണ്ടാക്കാനും ഗ്രീൻ ടീ സഹായിക്കും. 

ഗ്രീൻടീയിലടങ്ങിയ ശക്തിയേറിയ ആന്‍റി ഓക്സിഡന്റായ കറ്റേച്ചിനുകൾ ചീത്ത കൊളസ്ട്രോൾ (LDL) കുറയ്ക്കുകയും ഹൃദയധമനികളിൽ പ്ലേക്ക് അടിഞ്ഞുകൂടുന്നതിനെ തടയുകയും ചെയ്തുകൊണ്ട്, ഹൃദയാരോഗ്യം വർധിപ്പിക്കും എന്ന് പഠനങ്ങൾ പറയുന്നു. 

കൂടാതെ, ഗ്രീൻ ടീയിലടങ്ങിയ ഫ്ലേവനോയ്ഡുകൾ രക്തക്കുഴലുകളെ റിലാക്സ് ചെയ്യിപ്പിച്ച് രക്തചംക്രമണം മെച്ചപ്പെടുത്തുന്നു. ഗ്രീൻടീയിലടങ്ങിയ പോളിഫിനോളുകൾ, ഉയർന്ന രക്തസമ്മർദത്തിനു കാരണമാകുന്ന ഇൻഫ്ലമേഷനെ കുറയ്ക്കുന്നു. ദിവസവും രാവിലെ വെറുംവയറ്റിൽ ഒരു കപ്പ് ഗ്രീൻ ടീ കുടിക്കുന്നത് രക്തസമ്മർദം നിയന്ത്രിക്കും എന്ന് പഠനങ്ങളിൽ തെളിഞ്ഞിട്ടുണ്ട്.

അതേപോലെ ഗ്രീൻ ടീയിൽ അടങ്ങിയിരിക്കുന്ന പോളിഫെനോളുകള്‍ തിളക്കമുള്ള ചർമം നല്‍കുമെന്നും പറയപ്പെടുന്നു.

ഗ്രീൻ ടീയ്ക്ക് സ്വാഭാവികമായി ഇതേപോലെ ഒട്ടേറെ ആരോഗ്യഗുണങ്ങളുണ്ട്. എന്നാല്‍, എല്ലാ ദിവസവും ഗ്രീന്‍ കുടിച്ചിട്ടും ഈ ഗുണങ്ങള്‍ കിട്ടുന്നതായി തോന്നുന്നില്ലേ? പരമാവധി ഗുണങ്ങള്‍ കിട്ടാനായി അത് കുടിക്കേണ്ട രീതിയുണ്ട്. ഗ്രീന്‍ ടീ കുടിക്കുമ്പോള്‍ ഒഴിവാക്കേണ്ട തെറ്റുകളെക്കുറിച്ച് ഇന്‍സ്റ്റഗ്രാമില്‍ പോസ്റ്റ്‌ പങ്കുവച്ചിരിക്കുകയാണ് ഡയറ്റീഷ്യനായ ശിഖ കുമാരി.

1. ഒഴിഞ്ഞ വയറ്റിൽ കുടിക്കുന്നത്:  

രാവിലെ സാധാരണ ചായയ്ക്ക് പകരം ഗ്രീൻ ടീ കുടിച്ചാണ് പലരും ദിവസം തുടങ്ങുന്നത്. എന്നാല്‍ ഇത് നല്ല രീതിയല്ല. ഗ്രീൻ ടീയിൽ ടാനിനുകൾ അടങ്ങിയിട്ടുണ്ട്, ഇത് വെറും വയറ്റിൽ കഴിച്ചാൽ വയറ്റിലെ അസിഡിറ്റി വർദ്ധിപ്പിക്കുകയും, അസ്വസ്ഥതയോ ഓക്കാനമോ ഉണ്ടാക്കുകയും ചെയ്യും. അതിനാൽ ദഹന പ്രശ്നങ്ങൾ തടയാൻ ഗ്രീൻ ടീ കുടിക്കുന്നതിന് മുമ്പ് എന്തെങ്കിലും കഴിക്കുന്നത് നല്ലതാണ്. 

2. അമിതമായ അളവിൽ കുടിക്കുന്നത്:  

ഗ്രീൻ ടീ നിരവധി ആരോഗ്യ ഗുണങ്ങൾ നൽകുമെന്നത് ശരിയാണ്, പക്ഷേ അമിതമായി ഗ്രീൻ ടീ കുടിക്കുന്നത് നല്ലതല്ല. അമിതമായി ഗ്രീൻ ടീ കുടിക്കുന്നത് ഉറക്കമില്ലായ്മ, ഉത്കണ്ഠ, ദഹന പ്രശ്നങ്ങൾ എന്നിവയ്ക്ക് കാരണമാകും. ദിവസേനയുള്ള ഉപഭോഗം 2-3 കപ്പായി പരിമിതപ്പെടുത്താൻ ഡയറ്റീഷ്യൻ ശിഖ കുമാരി ഉപദേശിക്കുന്നു. 

3. രാത്രിയിൽ കുടിക്കുന്നത്:  

ഗ്രീൻ ടീ ആരോഗ്യകരമാകുമെങ്കിലും അതിൽ കഫീൻ അടങ്ങിയിട്ടുണ്ടെന്ന കാര്യം മറക്കരുത്. ഉറക്കസമയത്തിനോടടുത്ത് കഴിച്ചാൽ, ഇത് നിങ്ങളുടെ ഉറക്കചക്രത്തെ തടസ്സപ്പെടുത്തിയേക്കാം. അതിനാൽ, ഉറങ്ങാൻ പോകുന്നതിന് കുറഞ്ഞത് 2-3 മണിക്കൂർ മുന്‍പുള്ള സമയത്ത് ഗ്രീൻ ടീ കുടിക്കുന്നത് ഒഴിവാക്കുക. 

4. ഭക്ഷണം കഴിച്ച ഉടന്‍ കുടിക്കുക:  

ഭക്ഷണത്തിന് തൊട്ടുപിന്നാലെ ഗ്രീൻ ടീ കുടിക്കുന്നത് ഭക്ഷണത്തിൽ നിന്നുള്ള ഇരുമ്പ് ആഗിരണം തടസ്സപ്പെടുത്തുകയും കാലക്രമേണ വിളർച്ചയ്ക്ക് കാരണമാവുകയും ചെയ്യും . ഗ്രീൻ ടീ കുടിക്കുന്നതിന് മുമ്പ് ഭക്ഷണത്തിന് ശേഷം കുറഞ്ഞത് ഒരു മണിക്കൂറെങ്കിലും കാത്തിരിക്കണമെന്ന് ശിഖ കുമാരി നിർദ്ദേശിക്കുന്നു. 

5. തിളച്ച വെള്ളത്തിൽ ഉണ്ടാക്കുക:  

ഗ്രീൻ ടീ തിളച്ച വെള്ളത്തില്‍ നേരിട്ട് ഇടരുത്. തിളച്ച വെള്ളം ഉപയോഗിക്കുന്നത് ഗ്രീൻ ടീയിലെ ഗുണകരമായ സംയുക്തങ്ങളെ നശിപ്പിക്കുകയും കയ്പേറിയ രുചി ഉണ്ടാക്കുകയും ചെയ്യും. വെള്ളം ആദ്യം തിളപ്പിച്ച് അതിന്റെ താപനില 80-85 ഡിഗ്രി സെൽഷ്യസിലേക്ക് താഴ്ത്തി ഗ്രീൻ ടീ ഉണ്ടാക്കുന്നതാണ് ഉത്തമം. 

6. മരുന്നുകളോടൊപ്പം കഴിക്കുന്നത്:  

രക്തം കട്ടി കുറയ്ക്കുന്ന മരുന്നുകൾ, ആന്‍റി ഡിപ്രസന്റുകൾ, രക്തസമ്മർദ്ദ മരുന്നുകൾ എന്നിവയുൾപ്പെടെയുള്ള ചില മരുന്നുകളുമായി ഗ്രീൻ ടീ പ്രതിപ്രവര്‍ത്തിക്കാൻ സാധ്യതയുണ്ട്. അത്തരം മരുന്നുകൾ കഴിക്കുന്ന ആളുകള്‍ ഗ്രീൻ ടീ കഴിക്കുന്നതിന് മുമ്പ് ഡോക്ടറെ സമീപിക്കാൻ ശിഖ കുമാരി നിർദ്ദേശിക്കുന്നു. 

7. ടീ ബാഗുകൾ വീണ്ടും ഉപയോഗിക്കുക:  

ഒരിക്കല്‍ ഉപയോഗം കഴിഞ്ഞ ഗ്രീൻ ടീ ബാഗുകൾ വീണ്ടും ഉപയോഗിക്കുമ്പോൾ ചായയ്ക്ക് അത്ര പുതുമയോ സ്വാദോ തോന്നുന്നില്ല എന്നത് പലരും ശ്രദ്ധിച്ചിട്ടുണ്ടാകും. ഇതില്‍ നിന്നും ഗ്രീന്‍ ടീയുടെ ഗുണങ്ങളും കിട്ടില്ല. അതിനാല്‍, ഗ്രീൻ ടീ ഉണ്ടാക്കുമ്പോഴെല്ലാം പുതിയ ചായ ഇലകൾ അല്ലെങ്കിൽ പുതിയ ടീ ബാഗ് ഉപയോഗിക്കണം.