ദുരിതമോചനത്തിന് രാമകഥാമൃതം

ദുരിതങ്ങളിൽ നിന്നെല്ലാം മോചനം എങ്ങനെ?  ആ സംശയത്തിനുള്ള ഉത്തരമാണു രാമായണം.  മുക്തി അഥവാ മോക്ഷം എന്നതു ജീവിതത്തിനു ശേഷം മാത്രം കിട്ടുന്ന ഒന്നല്ല. ഈ ലോകത്തു ജീവിച്ചുകൊണ്ടു തന്നെ മോക്ഷം അഥവാ ദുരിതമോചനം സാധ്യമാണെന്നു രാമായണത്തിൽ പല സന്ദർഭങ്ങളിലും പറയുന്നു.   

രാമകഥയ്ക്കൊടുവിൽ പൈങ്കിളി പാടുന്നതിങ്ങനെ:

'അധ്യാത്മരാമായണമിദമെത്രയു-

മത്യുത്തമോത്തമം മൃത്യുഞ്ജയപ്രോക്തം

അധ്യയനം ചെയ്കിൽ മർത്യനിജ്ജന്മനാ

മുക്തി സിദ്ധിക്കുമതിനില്ല സംശയം.'

അധ്യാത്മജ്ഞാനത്തിന്റെ വഴിയിലൂടെ മുന്നോട്ടു പോയാൽ ദുരിതങ്ങളിൽ നിന്നെല്ലാം മോചനം ഉറപ്പാണെന്നാണു രാമകഥ നമ്മോടു പറയുന്നത്.

ഈ ലോകത്തെ ഭൌതികമായ അഭിവൃദ്ധിക്കും ഇതു തന്നെ വഴിയെന്നു കൂടി പൈങ്കിളി പാടുന്നു:

'മൈത്രീകരം ധനധാന്യവൃദ്ധിപ്രദം

ശത്രുവിനാശനമാരോഗ്യവർധനം

ദീർഘായുരർഥപ്രദം പവിത്രം പരം

സൌഖ്യപ്രദം സകലാഭീഷ്ടസാധകം.'

ശത്രുവിനാശനം, ആരോഗ്യം, ദീർഘായുസ്സ്, സമ്പത്ത്, സുഖം എന്നിവ മാത്രമല്ല അഭീഷ്ടകാര്യങ്ങൾ മുഴുവൻ നേടാൻ ഈ ആധ്യാത്മികജ്ഞാനത്തിലൂടെ കഴിയും എന്നാണു പൈങ്കിളി പറയുന്നത്.

ലൌകികതയെ തള്ളിപ്പറയുന്നില്ല രാമായണം. ഭൌതിക സുഖഭോഗങ്ങൾക്കു വേണ്ടി മാത്രമായി പരസ്പരം പോരാടി സ്വയം നശിക്കുന്നതിന്റെ നിഷ്ഫലതയെക്കുറിച്ച് ഓർമപ്പെടുത്തുകയാണു രാമകഥ.

English Summary : Ramayana Parayanam Day 31 By Raveendran Kalarikkal