യുഎസിലെത്തുന്ന കുടിയേറ്റക്കാരിൽ പകുതിയിലധികം പേരും താമസിക്കുന്നത് നാല് സംസ്ഥാനങ്ങളിൽ

ഒർലാൻഡോ (ഫ്ലോറിഡ) ∙ യുണൈറ്റഡ് സ്റ്റേറ്റ്സിൽ കുടിയേറിയ  വിദേശികളുടെ  ജനസംഖ്യയിൽ  പകുതിയിലധികം പേരും താമസിക്കുന്നത് വെറും നാല് സംസ്ഥാനങ്ങളിലാണ്. കാലിഫോർണിയ, ടെക്സസ്, ഫ്ലോറിഡ, ന്യൂയോർക്ക് എന്നീ സംസ്ഥാനങ്ങളിൽ വിദേശിയരുടെ എണ്ണം വർഷങ്ങളായി വർധിച്ചുവരുന്നതായി യുഎസ് സെൻസസ് ബ്യൂറോ ചൊവ്വാഴ്ച പുറത്തുവിട്ട പുതിയ റിപ്പോർട്ടിൽ ചൂണ്ടികാണിക്കുന്നു. ഇവരിൽ പകുതിയും അമേരിക്കൻ പൗരത്വം സ്വീകരിച്ചവരാണ്.

2024-ലെ പ്രസിഡൻ്റ് തിരഞ്ഞെടുപ്പിൽ കുടിയേറ്റം ഒരു പ്രധാന പ്രശ്നമായി മാറിയതിനാലാണ് റിപ്പോർട്ട് പുറത്തുവിട്ടത്. തെക്കുപടിഞ്ഞാറൻ അതിർത്തിയിൽ അഭൂതപൂർവമായ കുടിയേറ്റക്കാരെ നിയന്ത്രിക്കാൻ ബൈഡൻ ഭരണകൂടം പാടുപെടുകയാണ്. മെക്‌സിക്കോയുമായുള്ള യുഎസ് അതിർത്തിയിലെ പ്രശ്‌നങ്ങൾ പരിഹരിക്കാനും  വോട്ടർമാരെ ബോധ്യപ്പെടുത്താനും ഡെമോക്രാറ്റുകൾ ശ്രമിക്കുന്നു.

ബ്യൂറോയുടെ അമേരിക്കൻ കമ്മ്യൂണിറ്റി സർവേയുടെ കണക്കുകൾ പ്രകാരം, 2022-ൽ, വിദേശികളുടെ ജനസംഖ്യ 46.2 ദശലക്ഷമായി കണക്കാക്കപ്പെടുന്നു,  യുഎസ് ജനസംഖ്യയുടെ ഏതാണ്ട് 14% ആണ് ഇത്.