ഇസാഫിന് മികച്ച നേട്ടം; അറ്റാദായത്തിൽ 44.8 % വർധന

കൊച്ചി ∙ ഇസാഫ് സ്മോൾ ഫിനാൻസ് ബാങ്ക് ആദ്യ പാദത്തിൽ 63 കോടി രൂപ അറ്റാദായം നേടി; കഴിഞ്ഞ പാദത്തെക്കാൾ 44.8 % വർധന. മൊത്തം ബിസിനസ് 23.4 % വർധിച്ചു 40,551 കോടിയായി. മുൻ വർഷം ഇതേ കാലയളവിൽ 32,860 കോടി രൂപയായിരുന്നു. 

മൊത്ത വായ്പ 30 % വർധനയോടെ 18783 കോടിയിലെത്തി. മൊത്തം നിക്ഷേപം 33.4 % ഉയർന്ന് 20,887 കോടി രൂപയായി. കഴിഞ്ഞ സാമ്പത്തിക വർഷത്തെ അപേക്ഷിച്ചു മൊത്തം ബിസിനസിന്റെ സുപ്രധാന മേഖലകളിൽ 23.4 ശതമാനത്തിന്റെ വർധനയുണ്ടെന്ന് എംഡിയും സിഇഒയുമായ കെ.പോൾ തോമസ് പറഞ്ഞു.