റമസാൻ: 79 ഭാഷകളിലായി 45 രാജ്യങ്ങളിലേക്ക്; 1.2 ദശലക്ഷം ഖുർ ആൻ വിതരണത്തിന് അനുമതി നൽകി സൗദി രാജാവ്

ജിദ്ദ ∙ 45 രാജ്യങ്ങളിലായി 79 ഭാഷകളിലായുള്ള ഖുർആനിന്‍റെ വിവർത്തനങ്ങളും 1.2 ദശലക്ഷം കോപ്പികളും  വിതരണം ചെയ്യാൻ സൗദി ഭരണാധികാരി സൽമാൻ രാജാവ് അംഗീകാരം നൽകി. 45 രാജ്യങ്ങളിലെ ഇസ്ലാമിക സാംസ്കാരിക കേന്ദ്രങ്ങളിലും അവിടങ്ങളിലെ സൗദി എംബസികളിലെ മതപരമായ അറ്റാച്ച് ഓഫിസുകളിലുമാണ് ഇവ വിതരണം ചെയ്യുക.

റമസാനിൽ ഇസ്ലാമിക് അഫയേഴ്സ്, കോൾ, ഗൈഡൻസ് മന്ത്രാലയം നടപ്പാക്കുന്ന, സൽമാൻ രാജാവിൽ നിന്നും ഖുർആനിന്‍റെ പകർപ്പുകൾ സമ്മാനിക്കുന്ന പരിപാടിയുടെ ഭാഗമാണ് വിതരണം. ലോകമെമ്പാടുമുള്ള മുസ്‌ലീങ്ങൾക്കുള്ള തുടർച്ചയായ  പരിചരണത്തിനും പിന്തുണയ്ക്കും സൽമാൻ രാജാവിനോടും കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാനോടും  ഇസ്ലാമിക കാര്യ മന്ത്രി ഷെയ്ഖ് അബ്ദുല്ലത്തീഫ് അൽ-ഷെയ്ഖ് നന്ദി അറിയിച്ചു.

ലോകമെമ്പാടുമുള്ള ഏറ്റവും മികച്ചതും സൂക്ഷ്മമായി നിർമ്മിച്ചതുമായ പതിപ്പുകളിൽ ഒന്നായി അച്ചടിച്ച കോപ്പികളെ മന്ത്രി വിശേഷിപ്പിച്ചു. ഈ പരിപാടി ഖുർആൻ പ്രചരിപ്പിക്കുന്നതിനുള്ള  നേതൃത്വത്തിന്‍റെ സമർപ്പണത്തെ പ്രതിഫലിപ്പിക്കുന്നതാണ്. ഇസ്‌ലാമിനെയും മുസ്‌ലീങ്ങളെയും സേവിക്കുന്നതിനും ഇസ്‌ലാമിന്‍റെ യഥാർത്ഥ സത്ത ഉൾക്കൊള്ളുന്ന സഹിഷ്ണുതയുടെയും സഹവർത്തിത്വത്തിന്‍റെയും മൂല്യങ്ങൾ പ്രോത്സാഹിപ്പിക്കുന്നതിനും അതിന്‍റെ ദൗത്യം നിറവേറ്റുന്നതിന് മന്ത്രാലയത്തിന് നേതൃത്വം നൽകുന്ന സുപ്രധാനവും തുടർച്ചയായതുമായ പിന്തുണയും അൽ-ഷെയ്ഖ് എടുത്തുപറഞ്ഞു.