യുകെയിൽ മരിച്ച യുവതിയുടെ ഭർത്താവ് ജീവനൊടുക്കിയ നിലയിൽ; നഴ്സായ യുവതി മരിച്ചത് കുഴഞ്ഞുവീണ്

കോട്ടയം ∙ യുകെയിൽ ഭാര്യ മരിച്ചതിനു പിന്നാലെ ഭർത്താവിനെ ജീവനൊടുക്കിയ നിലയിൽ കണ്ടെത്തി. പനച്ചിക്കാട് വലിയപറമ്പിൽ അനിൽ ചെറിയാന്റെ ഭാര്യ സോണിയ സാറ ഐപ് (39) കഴിഞ്ഞ ദിവസമാണു ലണ്ടനിലെ വീട്ടിൽ കുഴഞ്ഞുവീണു മരിച്ചത്. അനിലിനെ (റോണി– 44) ഇന്നലെ പുലർച്ചെ വീടിനു സമീപമുള്ള ആളൊഴിഞ്ഞ സ്ഥലത്ത് മരിച്ചനിലയിൽ കണ്ടെത്തുകയായിരുന്നു. 

കഴിഞ്ഞ ഞായറാഴ്ച കുഴഞ്ഞുവീണ സോണിയയെ ആശുപത്രിയിലെത്തിച്ചെങ്കിലും രക്ഷിക്കാനായില്ല. യുകെയിൽ നഴ്സായ സോണിയ കാലിൽ ശസ്ത്രക്രിയയ്ക്കായി 10 ദിവസത്തേക്കു നാട്ടിലെത്തിയിരുന്നു. ഞായറാഴ്ച മടങ്ങിയെത്തി ഒരു മണിക്കൂറിനുള്ളിലാണു കുഴഞ്ഞുവീണത്. ഭാര്യയുടെ അടുത്തേക്കു പോകുകയാണെന്നും മക്കളെ നോക്കണമെന്നും അനിൽ സുഹൃത്തുക്കൾക്കു സന്ദേശം അയച്ചിരുന്നു. സോണിയയുടെ മൃതദേഹം പോസ്റ്റ്മോർട്ടത്തിനായി മോർച്ചറിയിലാണ്. മക്കൾ: ലിസ, ലൂയിസ്.