പുതുവേലിയിൽ കെഎസ്ആർടിസി ബസ് മീഡിയനിൽ ഇടിച്ചു കയറി
Mail This Article
കൂത്താട്ടുകുളം∙എംസി റോഡിൽ പുതുവേലി വൈക്കം റോഡ് കവലയിൽ വീണ്ടും വാഹനാപകടം. തിരുവനന്തപുരത്തു നിന്നും കോഴിക്കോടിന് പോവുകയായിരുന്ന കെഎസ്ആർടിസി ജനറം എസി ലോഫ്ലോർ ബസാണ് മീഡിയനിൽ ഇടിച്ചു കയറിയത്. ഇന്നലെ പുലർച്ചെയാണ് സംഭവം. ആർക്കും പരുക്കില്ല. വൈക്കം ഭാഗത്തു നിന്നു വരികയായിരുന്ന ബൈക്ക് യാത്രികൻ അശ്രദ്ധമായി പ്രധാന റോഡിലേക്ക് കടന്നതാണ് അപകട കാരണം. അതേസമയം പുതുവേലി വൈക്കം റോഡ് കവലയിൽ അപകടങ്ങൾ തുടർക്കഥയാകുന്നു. എംസി റോഡിൽ അശാസ്ത്രീയമായി നിർമിച്ച മീഡിയൻ ആണ് അപകടക്കെണി.
വാഹനങ്ങൾ കയറ്റം കയറി വരുമ്പോൾ ഡിവൈഡർ ഡ്രൈവർമാരുടെ ശ്രദ്ധയിൽപെടില്ല. ഈ ഭാഗത്തെ സൗരോർജ വിളക്കുകളും തെളിയുന്നില്ല. കഴിഞ്ഞയാഴ്ച 2 തടിലോറികൾ ഇവിടെ അപകടത്തിൽപെട്ടു. റോഡ് വികസനത്തിന്റെ ഭാഗമായി കെഎസ്ടിപി ആണ് മീഡിയൻ സ്ഥാപിച്ചത്. ഇതുമൂലം റോഡിന് വീതി കുറഞ്ഞു. കവലയിൽ വൈക്കം റോഡിൽ നിന്നും എംസി റോഡിലേക്ക് തിരിയുന്ന ഭാഗവും മീഡിയനുകളും തമ്മിൽ 3 മീറ്റർ ദൂരം മാത്രമാണ് ഉള്ളത്. ഇവിടെ നാളുകളായി ട്രാഫിക് സിഗ്നൽ സംവിധാനമില്ല. അപകടങ്ങൾ ഉണ്ടാകുമ്പോൾ പൊതുമരാമത്ത് വകുപ്പ് ഉദ്യോഗസ്ഥർ സ്ഥലത്ത് പരിശോധന നടത്തി ജനങ്ങളെ കബളിപ്പിക്കുകയാണെന്നാണ് ആക്ഷേപം. അപകടത്തിന് കാരണമായ മീഡിയൻ പൊളിച്ചു നീക്കണമെന്ന ആവശ്യം ശക്തമാണ്.
