എരുമേലി– റാന്നി റോഡ്: വളവ് ഇറങ്ങി കുഴിയിലേക്ക്

എരുമേലി ∙ കരിങ്കല്ലുമ്മൂഴിയിൽ റോഡിലെ കുഴി അപകടങ്ങൾക്കു കാരണമാകുന്നു. എരുമേലി– റാന്നി റോഡിൽ നിന്ന് ശബരിമല റോഡിലേക്കു പ്രവേശിക്കുന്ന സ്ഥലത്താണ് വലിയ കുഴികൾ രൂപപ്പെട്ടിരിക്കുന്നത്. അപകട വളവും ഇറക്കവും ഇറങ്ങി വരുന്ന വാഹനങ്ങളാണ് കുഴിയിൽ ചാടുന്നത്. ഒട്ടേറെ ഇരുചക്രവാഹനങ്ങളാണ് ഇവിടെ അപകടത്തിൽപെടുന്നത്. പാറമടകളിൽ നിന്ന് നിരന്തരം ഭാരവണ്ടികൾ കടന്നുപോകുന്നതാണു റോഡിൽ കുഴി ഉണ്ടാകാൻ കാരണമെന്ന് പറയുന്നു. പാറയുമായി വരുന്ന ടോറസ് ഉൾപ്പെടെയുള്ള വാഹനങ്ങൾ റാന്നി റോഡിലേക്ക് ഏറെ ബുദ്ധിമുട്ടിയാണ് തിരിയുന്നത്.   റാന്നി റോഡിൽ ഇതു ഗതാഗത തടസ്സങ്ങൾക്കും കാരണമാകുന്നുണ്ട്.