മാലിന്യത്തിൽ നിറഞ്ഞ് പിണ്ടിയോട് റോഡ്

ആലത്തൂർ∙ ഗാന്ധിജംക്‌ഷനു സമീപം പിണ്ടിയോട് റോഡരികിൽ മാലിന്യം തള്ളുന്നു. പുതിയങ്കം ജിയുപി സ്കൂളിനു മുന്നിൽ പാത തുടങ്ങുന്നിടത്താണ് പ്ലാസ്റ്റിക് ചാക്കുകളിലും കവറുകളിലും മാലിന്യങ്ങൾ ഇടുന്നത്. പാതയരികിലെ കുറ്റിക്കാടുകളിൽ ഇവ നിറഞ്ഞിരിക്കുകയാണ്. പൈപ്പ് ലൈനുകളിലും മാലിന്യം നിക്ഷേപിക്കുന്നുണ്ട്. നായ്ക്കളുടെ കൂട്ടം ഇവിടെയുള്ള പ്ലാസ്റ്റിക് കവറുകൾ പൊട്ടിച്ച് പഴകിയ ഭക്ഷണം തിന്നാനായി എത്തുന്നുണ്ട്. ഇത് മൂലം ഇതുവഴി സ്കൂളിലേക്കു പോകുന്ന കുട്ടികൾ ഭയപ്പാടിലാണ്. ഈ പാതയിൽ നിന്ന് ചെറുതറയിലേക്കു പോകുന്ന ഭാഗത്തും മാലിന്യങ്ങൾ തള്ളുന്നുണ്ട്. ഈ രണ്ടിടത്തും സിസിടിവി ക്യാമറകൾ സ്ഥാപിച്ച് മാലിന്യങ്ങൾ തള്ളുന്നവരെ തടയണമെന്നും ഇവരിൽ നിന്ന് പിഴ ഈടാക്കണമെന്നുമാണ് ആവശ്യം.