സ്ത്രീകളുടെ വസ്ത്രശാലകളിൽ പുരുഷ ജീവനക്കാർ വേണ്ട?; ബഹ്‌റൈനിൽ വിവാദം

മനാമ ∙ ബഹ്‌റൈനിലെ വനിതകൾക്ക് മാത്രമായുള്ള വസ്ത്ര വ്യാപാര സ്ഥാപനങ്ങളിൽ പുരുഷ ജീവനക്കാരെ നിയമിക്കുന്നത് വിലക്കണമെന്ന് ആവശ്യം. മുഹറഖ് മുനിസിപ്പൽ കൗൺസിലാണ് ഈ നിർദ്ദേശം വ്യവസായ വാണിജ്യ മന്ത്രി അബ്ദുള്ള ഫഖ്‌റോയ്ക്ക് സമർപ്പിച്ചത്. സ്ത്രീകളുടെ വസ്ത്രങ്ങൾ, തയ്യൽ, അനുബന്ധ ഉപകരണങ്ങൾ എന്നിവ വിൽക്കുന്ന കടകളിൽ പുരുഷ തൊഴിലാളികളെ പൂർണ്ണമായി വിലക്കണമെന്ന ഈ നിർദ്ദേശം വിവാദപരമാണെങ്കിലും ഇതിന് വലിയ പിന്തുണ ലഭിക്കുന്നുണ്ട്.

വനിതകൾക്ക് മാത്രമായുള്ള കടകളിൽ ഉണ്ടാകുന്ന 'സാമൂഹിക അസ്വസ്ഥതകൾ' ഒഴിവാക്കുന്നതിനും വനിതാ ജീവനക്കാർക്ക് കൂടുതൽ തൊഴിലവസരങ്ങൾ നൽകുന്നതിനുമാണ് ഈ നിർദ്ദേശം ലക്ഷ്യമിടുന്നതെന്ന് മുനിസിപ്പൽ കൗൺസിൽ പറയുന്നു. ഈ നീക്കം പൊതുജനങ്ങളുടെ വർധിച്ചുവരുന്ന ആശങ്കയുടെ ഫലമാണെന്നും തൊഴിലില്ലാത്ത ബഹ്‌റൈൻ സ്ത്രീകൾക്ക് കൂടുതൽ തൊഴിൽ സാധ്യതകൾ സൃഷ്ടിക്കുക എന്നതാണ് ഇതിന്റെ പ്രധാന ലക്ഷ്യമെന്നും കൗൺസിലർമാർ അഭിപ്രായപ്പെട്ടു.

ഇത്തരം ജോലികൾ കൂടുതലും സ്ത്രീകൾ ചെയ്യുന്ന മേഖലയാണെങ്കിലും, പല സ്ഥാപനങ്ങളിലും സ്ത്രീകളെ സഹായിക്കാൻ പുരുഷ ജീവനക്കാരും ഉണ്ടാകാറുണ്ട് എന്ന് ഈ സംരംഭത്തിന് നേതൃത്വം നൽകിയ കൗൺസിൽ ചെയർമാൻ അബ്ദുൽ അസീസ് അൽ നാർ പറഞ്ഞു. ചില വനിതാ ഉപഭോക്താക്കൾ പുരുഷന്മാർ ജോലി ചെയ്യുന്ന കടകളിൽ പോകാൻ താൽപര്യം കാണിക്കുന്നില്ല. പുരുഷ ജീവനക്കാരെ മോശമായി ചിത്രീകരിക്കുക എന്നതല്ല തങ്ങളുടെ ലക്ഷ്യമെന്നും ബഹ്‌റൈനിലെ പൗരന്മാരുടെ സാംസ്കാരിക യാഥാർഥ്യങ്ങളെയും വ്യക്തിപരമായ സൗകര്യങ്ങളെയും മാനിക്കേണ്ടതുണ്ടെന്നും അദ്ദേഹം വ്യക്തമാക്കി.

ബഹ്‌റൈനിലെ സ്ത്രീകൾക്ക് മികച്ച തൊഴിലവസരങ്ങൾ നൽകുക എന്നതും ഈ തീരുമാനത്തിന്റെ ലക്ഷ്യമാണ്. നിലവിൽ നിരവധി കഴിവുള്ളവരും യോഗ്യതയുള്ളവരുമായ ബഹ്‌റൈൻ സ്ത്രീകൾ തൊഴിൽരഹിതരായി ഇരിക്കുന്നുണ്ടെന്നും അൽ നാർ ചൂണ്ടിക്കാട്ടി. 2017ൽ, ഡിപ്പാർട്ട്‌മെന്റ് സ്റ്റോറുകളിൽ സ്വകാര്യതാ സ്ക്രീനുകൾ സ്ഥാപിക്കണമെന്നും അടിവസ്ത്ര വിഭാഗങ്ങളിൽ വനിതാ ജീവനക്കാരെ മാത്രമേ നിയമിക്കാവൂ എന്നും മുഹറഖ് മുനിസിപ്പൽ കൗൺസിൽ നിർദ്ദേശിച്ചിരുന്നു. എന്നാൽ അന്ന് വാണിജ്യ മന്ത്രി ഈ നിർദ്ദേശം അംഗീകരിച്ചില്ല. ഉൽപന്നങ്ങൾ എങ്ങനെ വിൽക്കണം, ആരെ നിയമിക്കണം എന്നതിൽ സ്ഥാപനങ്ങൾക്ക് സ്വാതന്ത്ര്യമുണ്ടെന്നായിരുന്നു അദ്ദേഹത്തിന്റെ വാദം.

നിലവിലെ നിർദ്ദേശം മന്ത്രാലയം അംഗീകരിക്കുകയാണെങ്കിൽ, ബഹ്‌റൈനിലുടനീളമുള്ള വനിതാ കേന്ദ്രീകൃത കടകളിലെ ജീവനക്കാരുടെ നിയമനങ്ങളിൽ ഇത് ഒരു പുതിയ മാതൃക സൃഷ്ടിക്കും. പുരുഷ തൊഴിലാളികളെ ഒഴിവാക്കുക എന്നതല്ല ലക്ഷ്യമെന്നും മറിച്ച് ആവശ്യക്കാരുള്ള ഒരു മേഖലയിൽ സ്ത്രീകളെ കൂടുതൽ ശക്തരാക്കുക എന്നതാണ് തങ്ങളുടെ ഉദ്ദേശ്യമെന്നും അൽ നാർ ആവർത്തിച്ചു. എന്നാൽ മന്ത്രാലയം ഈ നീക്കത്തിന് അംഗീകാരം നൽകുമോ എന്ന കാര്യം ഇപ്പോഴും അനിശ്ചിതത്വത്തിലാണ്. ലിംഗപരമായ വേർതിരിവ്, ജോലിസ്ഥലത്തെ നീതി, ഉപഭോക്തൃ സൗകര്യം എന്നിവയുമായി ബന്ധപ്പെട്ട ചർച്ചകൾ തുടരുമെന്നും കൗൺസിലർ മാധ്യമങ്ങളോട് പറഞ്ഞു.