ബിജിബാൽ മാജിക്കിൽ ‘ഡാൻസ് പാർട്ടി’യിലെ മെലഡി; പിന്നണി പാടിയത് സംഗീത ശ്രീകാന്ത്

ഓൾഗ പ്രൊഡക്‌ഷൻസിന്റെ ബാനറിൽ സോഹൻ സീനുലാൽ രചനയും സംവിധാനവും നിർവഹിക്കുന്ന ‘ഡാൻസ് പാർട്ടി’യിലെ പുതിയ ഗാനം പ്രേക്ഷകർക്കരികിൽ. ബിജിബാൽ ഈണം പകർന്ന ‘ചിലു ചിലു ചിലങ്ക’ എന്നു തുടങ്ങുന്ന ഗാനമാണ് അണിയറപ്രവർത്തകർ പുറത്തിറക്കിയത്. സന്തോഷ് വർമയാണ് പാട്ടിനു വരികൾ കുറിച്ചത്. സംഗീത ശ്രീകാന്ത് ഗാനം ആലപിച്ചു. മനോരമ മ്യൂസിക് ആണ് പാട്ട് പ്രേക്ഷകർക്കു മുന്നിലെത്തിച്ചത്. 

പാട്ട് ഇതിനകം ശ്രദ്ധേയമായിക്കഴിഞ്ഞു. മികച്ച പ്രേക്ഷകപ്രതികരണങ്ങളാണു ലഭിക്കുന്നത്. ചിത്രത്തിലെ നേരത്തേ പുറത്തിറങ്ങിയ പാട്ടുകളും ഏറെ ശ്രദ്ധിക്കപ്പെട്ടിരുന്നു. ബിജിബാലിനെക്കൂടാതെ രാഹുൽ രാജ്, വി3കെ എന്നിവരും ചിത്രത്തിനു വേണ്ടി പാട്ടുകളൊരുക്കിയിട്ടുണ്ട്. റാപ്പർ ഫെജോ, നിഖിൽ.എസ്.മറ്റത്തിൽ എന്നിവരാണ് ചിത്രത്തിനു വേണ്ടി മറ്റു ഗാനങ്ങൾ എഴുതിയിരിക്കുന്നത്. 

വിഷ്ണു ഉണ്ണികൃഷ്ണൻ, ശ്രീനാഥ് ഭാസി, ഷൈൻ ടോം ചാക്കോ, പ്രയാഗ മാർട്ടിൻ, ജൂഡ് ആന്തണി, ശ്രദ്ധ ഗോകുൽ, പ്രീതി രാജേന്ദ്രൻ, തുടങ്ങിയവർ പ്രധാന വേഷങ്ങളിലെത്തുന്ന ചിത്രമാണ് ‘ഡാൻസ് പാർട്ടി’. റെജി പ്രോത്താസിസ്, നൈസി റെജി എന്നിവർ ചേർന്നു ചിത്രം നിർമിക്കുന്നു. കൊച്ചി, ബെംഗളൂരു എന്നിവിടങ്ങളിലായി ചിത്രീകരണം പൂർത്തിയാക്കിയ ‘ഡാൻസ് പാർട്ടി’ റിലീസിനു തയ്യാറെടുക്കുകയാണ്.