താമരശ്ശേരി ചുരത്തിൽ മരച്ചില്ലകൾ തട്ടി വാഹനങ്ങൾക്ക് കേടുപാട്; വെട്ടിമാറ്റി ഹൈവേ പൊലീസ്

കോഴിക്കോട് ∙ താമരശ്ശേരി ചുരത്തിൽ വാഹനങ്ങൾക്ക് തടസ്സമായി നിന്ന മരച്ചില്ലകൾ വെട്ടിമാറ്റി ഹൈവേ പൊലീസ് സംഘം. ചുരത്തിന്റെ രണ്ടാംവളവിൽ തൂങ്ങിക്കിടന്ന മരച്ചില്ലകളാണ് പൊലീസ് സംഘം വെട്ടിമാറ്റിയത്. മരച്ചില്ലകളിൽ തട്ടി നിരവധി വാഹനങ്ങൾക്ക് കേടുപാട് സംഭവിക്കുന്നതായി യാത്രക്കാർ പരാതിപ്പെട്ടിരുന്നു. തുടർന്നായിരുന്നു പൊലീസ് നടപടി.

ഹൈവേ പൊലീസ് സബ് ഇൻസ്‌പെക്‌ടർ സലീം മുറ്റത്ത്, സിപിഒമാരായ ഷൈജു, ഷിനോജ് കുഞ്ഞൻ, ജിതേഷ് കാവിൽ തുടങ്ങിയവർ നേതൃത്വം നൽകി.

തിങ്കളാഴ്ച വൈകിട്ട് അഞ്ചിന് എട്ടാംവളവിന് മുകളിൽ കണ്ടെയ്‌നർ ലോറി ബ്രേക്ക് നഷ്ടപ്പെട്ട് സംരക്ഷണ ഭിത്തിയിലിടിച്ച് അപകടമുണ്ടായി. സംഭവത്തിൽ ആർക്കും പരുക്കില്ല.