ഡ്രൈ ഫ്രൂട്സ് കുതിർത്ത് കഴിക്കാറുണ്ടോ? വെള്ളത്തിലാണോ അതോ തേനിലാണോ നല്ലത്!

വളരെ ആരോഗ്യകരമായ ലഘുഭക്ഷണങ്ങളില്‍ ഒന്നാണ് ഡ്രൈ ഫ്രൂട്സ്. ഊർജ്ജ നില വർദ്ധിപ്പിക്കാനും ഹൃദയാരോഗ്യത്തിനും ചര്‍മസൗന്ദര്യത്തിനും രോഗപ്രതിരോധശേഷി കൂട്ടാനും രക്തത്തിലെ പഞ്ചസാര നിയന്ത്രണത്തിനുമെല്ലാം ഇവ സഹായിക്കുന്നു. ഉണക്കിയ പഴങ്ങളിൽ ധാരാളം വിറ്റാമിനുകളും ധാതുക്കളും ആന്‍റി ഓക്‌സിഡന്റുകളും ആരോഗ്യകരമായ കൊഴുപ്പുകളും നാരുകളുമെല്ലാം അടങ്ങിയിട്ടുണ്ട്.

ഡ്രൈ ഫ്രൂട്സ് ഓരോന്നിനും ഓരോ തരം ഗുണങ്ങളാണ് ഉള്ളത്. ബദാം തലച്ചോറിന്‍റെ പ്രവർത്തനം വർദ്ധിപ്പിക്കുന്നു, വാൽനട്ട് ഹൃദയത്തിനും മാനസികാരോഗ്യത്തിനും അത്യന്താപേക്ഷിതമായ ഒമേഗ-3 കൊണ്ട് സമ്പുഷ്ടമാണ്. ഉണക്കമുന്തിരിയാകട്ടെ  ഇരുമ്പിന്‍റെ അളവ് മെച്ചപ്പെടുത്തുന്നു. 

സാധാരണയായി ഡ്രൈ ഫ്രൂട്സ് വെള്ളത്തില്‍ കുതിര്‍ത്താണ് കഴിക്കുന്നത്. ഡ്രൈ ഫ്രൂട്ട്‌സ് വെള്ളത്തിൽ കുതിർക്കുന്നത് എൻസൈമുകളെ സജീവമാക്കുകയും ദഹനം മെച്ചപ്പെടുത്തുകയും പോഷകങ്ങളുടെ ആഗിരണം വർദ്ധിപ്പിക്കുകയും ചെയ്യുന്നു. വെള്ളത്തില്‍ കുതിര്‍ക്കുന്നത് പോലെ തന്നെ തേനില്‍ കുതിര്‍ത്തു വച്ചും ഈ ഡ്രൈ ഫ്രൂട്സ് കഴിക്കാറുണ്ട്. എന്നാല്‍ ഇവയില്‍ ഏതാണ് നല്ലത്?

വെള്ളത്തിൽ കുതിർത്ത ഡ്രൈ ഫ്രൂട്സ്

പലപ്പോഴും ഡ്രൈ ഫ്രൂട്സ് വെള്ളത്തിൽ രാത്രി മുഴുവൻ മുക്കിവയ്ക്കാറുണ്ട്. നട്സും വിത്തുകളും കുതിർക്കുന്നത്, അവയില്‍ നിന്നും എൻസൈം ഇൻഹിബിറ്ററുകളും ഫൈറ്റിക് ആസിഡും നീക്കംചെയ്യുന്നുവെന്ന് ആയുർവേദം പഠിപ്പിക്കുന്നു, അല്ലാത്തപക്ഷം ഇത് ദഹനത്തെ തടയുകയും പോഷക ആഗിരണം തടസ്സപ്പെടുത്തുകയും ചെയ്യും. ഒരിക്കൽ കുതിർത്താൽ പോഷകങ്ങൾ ശരീരത്തിന് സ്വാംശീകരിക്കാൻ എളുപ്പമാകും. 

കൂടാതെ, ഡ്രൈ ഫ്രൂട്സ് കുതിർക്കുന്നത് ഇരുമ്പ്, മഗ്നീഷ്യം, സിങ്ക് തുടങ്ങിയ ധാതുക്കളുടെ പോഷക ജൈവ ലഭ്യത വർദ്ധിപ്പിക്കാൻ സഹായിക്കുന്നു. കൂടാതെ, കുതിർക്കുന്നത് ശരീരത്തിൽ നിന്ന് വിഷവസ്തുക്കളെ പുറന്തള്ളാനും തിളങ്ങുന്ന ചർമത്തിനും മുടി വളർച്ചയ്ക്കും സഹായിക്കുന്നു.

തേനിൽ കുതിർത്ത ഡ്രൈ ഫ്രൂട്സ്

അസംസ്കൃത തേനിൽ കുതിർക്കുമ്പോൾ, അത് അവയെ കൂടുതൽ രുചികരമാക്കുക മാത്രമല്ല, അവയുടെ ആരോഗ്യ ഗുണങ്ങൾ വർദ്ധിപ്പിക്കുകയും ചെയ്യുന്നു. തേൻ ഒരു പ്രകൃതിദത്ത സംരക്ഷണമായി പ്രവർത്തിക്കുകയും ഉണങ്ങിയ പഴങ്ങളുടെ ഔഷധ ഗുണങ്ങൾ വർദ്ധിപ്പിക്കുകയും ചെയ്യുന്നുവെന്ന് കണ്ടെത്തിയിട്ടുണ്ട്. ആന്‍റി ഓക്‌സിഡന്റുകളുടെയും ആന്‍റി ബാക്ടീരിയൽ ഗുണങ്ങളുടെയും കൂടിച്ചേരലാണ് ഇവിടെ നടക്കുന്നത്. 

വെള്ളത്തിൽ കുതിർത്ത ഡ്രൈ ഫ്രൂട്സിൽ കാലറി കുറവാണ്, അതേസമയം തേനിൽ കുതിർത്തവയിൽ കലോറി വളരെ കൂടുതലാണ്. അതിനാല്‍ ഭാരം കുറയ്ക്കാന്‍ നോക്കുന്ന ആളുകള്‍ സ്ഥിരമായി തേനില്‍ കുതിര്‍ത്ത് കഴിക്കാതിരിക്കുന്നതാണ് നല്ലത്.