നിധി പോലെ സ്വാതന്ത്ര്യസമര സ്റ്റാംപ് ശേഖരം

തൃപ്പൂണിത്തുറ ∙ സ്വാതന്ത്ര്യ സമരത്തിന്റെ നേർചിത്രങ്ങളായ പോസ്റ്റൽ കാർഡുകളും ഫസ്റ്റ് ഡേ കവറുകളും സ്റ്റാംപുകളും നിധി പോലെ സൂക്ഷിക്കുകയാണ് എറണാകുളം കൃഷ്ണൻ നായർ സ്റ്റുഡിയോ ഉടമയായ തൃപ്പൂണിത്തുറ ശ്രീപത്മം വീട്ടിൽ അജിത്ത് കൃഷ്ണൻ നായർ.ഗാന്ധിജിയെപ്പറ്റിയുള്ള നൂറിലധികം പോസ്റ്റ് കവറുകളും അപൂർവ ചിത്രങ്ങളുമാണ് അദ്ദേഹത്തിന്റെ പക്കലുള്ളത്. രാജ്യം സ്വാതന്ത്ര്യം നേടിയ ദിവസം പുറത്തിറക്കിയ പോസ്റ്റൽ കാർഡുമുണ്ട്.  സ്വാതന്ത്ര്യസമര സേനാനികളായിരുന്ന എം.പി. കൃഷ്ണപിള്ളയുടെയും സരസ്വതിയുടെയും മകനായ അജിത്തിനു ചെറുപ്പം മുതലേ പോസ്റ്റൽ കാർഡും സ്റ്റാംപുകളും ശേഖരിക്കുന്നത് ഇഷ്ടവിനോദമായിരുന്നു. പിതാവ് ഉൾപ്പെട്ട സ്വാതന്ത്ര്യ സമര കാലത്തെ മഹാരാജാസ് കോളജിലെ വിദ്യാർഥി നേതാക്കളുടെ ചിത്രങ്ങളും സൂക്ഷിച്ചിട്ടുണ്ട്.