കൃഷി വകുപ്പിന്റെ പാക്കിങ് ; ഉൽപന്നങ്ങൾ ഇനി വേറെ ലെവൽ

മറയൂർ ∙ കേരളത്തിലെ മറയൂർ ശർക്കര ഉൾപ്പെടെയുള്ള 25 ഇനം കാർഷിക ഉൽപന്നങ്ങൾ ആകർഷകമായ പായ്ക്കിങ്ങുകളിൽ കേരള ബ്രാൻഡായി  വിപണിയിലെത്തിക്കാനുള്ള നടപടികൾ കൃഷി വകുപ്പ് ആരംഭിച്ചു.ചെറുകിട കർഷക അഗ്രി ബിസിനസ് കൺസോർഷ്യത്തിന്റെ കീഴിൽ  കേന്ദ്ര സർക്കാർ സ്ഥാപനമായ മുംബൈ ഇന്ത്യൻ ഇൻസ്റ്റിറ്റ്യൂട്ട് ഓഫ് പാക്കേജിങ്ങു (ഐഐപി)മായി സഹകരിച്ചാണ് പദ്ധതി നടപ്പിലാക്കുന്നത്. 

ഇതിന്റെ മുന്നോടിയായി ഫെബ്രുവരി 24 മുതൽ 26 വരെ തിരുവനന്തപുരം ആനയറയിൽ കൃഷി വകുപ്പിന്റെ പരിശീലന കേന്ദ്രമായ സമേതിയിൽ വച്ച് തിരഞ്ഞെടുക്കപ്പെട്ട കർഷക സംഘങ്ങൾക്കും സ്ഥാപനങ്ങൾക്കും പരിശീലനം നടക്കും. ഐഐപിയിലെയും ന്യൂഡൽഹി, മുംബൈ എന്നിവിടങ്ങളിലേയും വിദഗ്ധർ ക്ലാസ്സുകൾ എടുക്കും.കർഷകരുടെ വിളകൾക്ക് ന്യായ വിലയും വിപണിയും ഉറപ്പു വരുത്തുന്നു. 

ഉൽപന്നങ്ങളുടെ ഗുണമേന്മ ഉറപ്പു വരുത്തി പായ്ക്കിങ്ങിൽ ആകർഷകമായ മാറ്റം വരുത്തിയാൽ ഇത് സാധ്യമാകും എന്ന പ്രതീക്ഷയാണ് ഉള്ളത്.40 മൂല്യവർധിത ഉൽപന്നങ്ങളുമായി ബന്ധപ്പെട്ട സംഘങ്ങൾക്കും സ്ഥാപനങ്ങൾക്കുമാണ് ആദ്യഘട്ട പരിശീലനം നൽകുക. ഇതിൽ ഭൗമ സൂചിക പദവി ലഭിച്ച മറയൂർ ശർക്കരയും വാഴക്കുളം പൈനാപ്പിളും ഉൾപ്പെടുന്നു.

കൂടാതെ നാടൻ ചക്ക ചിപ്‌സ്, ഏത്തക്ക ചിപ്‌സ്, വെളിച്ചെണ്ണ , നാളികേര ഉൽപന്നങ്ങൾ, മുരിങ്ങക്കായ തുടങ്ങിയവും പുതിയ രൂപത്തിൽ ലോക വിപണികളിൽ എത്തും. പരിശീലനത്തിനും തുടർ പ്രവർത്തനങ്ങൾക്കും ഒരു ഉൽപന്നത്തിന് രണ്ടര ലക്ഷം രൂപ കൃഷി വകുപ്പ് ഐഐപിക്ക് നൽകും.40 സംഘങ്ങളിൽ നിന്നും 25 ഉൽപന്നങ്ങളെ തിരഞ്ഞെടുക്കും. ഉൽപന്നങ്ങളുടെ കാലദൈർഘ്യം, ഗുണമേന്മ ,വിപണന സാധ്യത എന്നിവ പരിഗണിച്ചാണ് തിരഞ്ഞെടുക്കുന്നത്. മൂന്നു തരം പായ്ക്കിങ്ങുകളുടെ പരിശീലനമാണ് നൽകുക. 

പ്രീമിയം , സ്റ്റാൻഡേർഡ്, ഗിഫ്റ്റ് എന്നീ രൂപത്തിലുള്ള പായ്ക്കിക്കിങ്ങുകളിൽ ഉൽപന്നങ്ങൾ വിപണിയിലെത്തിക്കാനുള്ള ശ്രമമാണ് നടന്നു വരുന്നത്. മറയൂർ ശർക്കര ഉൽപാദക സംഘങ്ങളുടെ പ്രതിനിധികളായി മറയൂർ കരിമ്പ് ഉൽപാദക സമിതിയുടെ വിജയൻ ,മഹാഡ് സംഘത്തിലെ എസ്.ഇന്ദ്രജിത്ത് എന്നിവർ പങ്കെടുക്കും.