കിലുക്കാംപെട്ടി വിളിച്ചു,‘ നീലക്കടുവകൾ’ പറന്നെത്തി

കിലുക്കാംപെട്ടിച്ചെടിയിൽ വിരുന്നെത്തിയ ‘നീലക്കടുവ ശലഭങ്ങൾ’ കൗതുകമായി. ദേശാടനം നടത്തുന്ന ശലഭ ഇനങ്ങളിൽ പ്രധാനിയാണ് ഇവ. നീലനിറത്തിൽ കടുവകളുടേതിനു സമാനമായ കറുത്ത വരകളാണ് ഈ പേരു ലഭിക്കാൻ കാരണം.കിലുക്കാംപെട്ടിച്ചെടികളാണ് ഈ ശലഭങ്ങളെ ആകർഷിക്കുന്നത്. ഈ ചെടിയുടെ ഇലയിലും തണ്ടിലും അടങ്ങിയിരിക്കുന്ന ആൽക്കലോയ്ഡുകളും പൂക്കളുമാണ് കാരണം. 

നീലക്കടുവകളുടെ പ്രജനനത്തിനും കിലുക്കാംപെട്ടിച്ചെടികൾ പങ്കുവഹിക്കുന്നു. വിത്ത് ഉണങ്ങിയാൽ കിലുക്കാംപെട്ടിയുടേതിനു സമാനമായ ശബ്ദം കേൾക്കുന്നതിനാലാണ് ഈ ചെടിക്ക് ‘കിലുക്കാംപെട്ടി’ എന്ന പേര്. ശലഭപ്പാർക്കുകളിലും മറ്റും ശലഭങ്ങളെ ആകർഷിക്കുന്നതിനായി ഈ ചെടി നട്ടുവളർത്താറുണ്ട്. പൂമ്പാറ്റക്കിലുക്കി, കിലുകിലുക്കി, പൂമ്പാറ്റച്ചെടി എന്നിങ്ങനെയും അറിയപ്പെടുന്നു.

റിട്ട. അധ്യാപകൻ നെടുങ്കണ്ടം പോത്തൻപ്പറമ്പിൽ ടോം ലൂക്കോസിന്റെ ഉദ്യാനത്തിലാണ് ഇത്തവണ നീലക്കടുവ ശലഭങ്ങൾ കൂട്ടമായെത്തിയത്.