മാർലിയും ബെർട്ടിയും; ഡോഗ് സ്ക്വാഡിലെ നവാഗതർ ചില്ലറക്കാരല്ല

കുറ്റാന്വേഷണത്തില്‍ തുമ്പുണ്ടാക്കാൻ എറണാകുളം റൂറൽ പോലീസിന് സഹായവുമായി മാർലിയും ബെർട്ടിയും എത്തുന്നു. പൊലീസ് അക്കാദമിയിൽനിന്നുള്ള പരിശീലന മികവുമായാണ് പൊലീസ് ഡോഗ് സ്ക്വാഡിലേക്ക് ഇരുവരുടെയും വരവ്.

എറണാകുളം റൂറൽ പോലീസിന്റെ ഡോഗ് സ്ക്വാഡിലെത്തിയ നവാഗതർ ചില്ലറക്കാരേയല്ല . െഎഎസിനെതിരായ പോരാട്ടത്തില്‍ യു.എസ് സേനയെ തുണച്ചതിലൂടെ പ്രശസ്തി നേടിയ ബെൽജിയൻ മലിനോയിസ് ഇനത്തിൽപെട്ടവളാണ് മാർലി. പൊലീസ് അക്കാദമിയിൽ പരിശീലനം നേടിയ 22 നായ്ക്കളിൽ ഒന്നാം സ്ഥാനക്കാരി. 

മോഷണം , കൊലപാതകം തുടങ്ങിയ കേസുകളിൽ അന്വേഷണം നടത്തുന്ന ട്രാക്കർ വിഭാഗത്തിൽ ഒമ്പത് മാസത്തെ തീവ്രപരിശീലനത്തിന‌്  ശേഷം മെഡലുമായാണ് മാർലി സേനയുടെ ഭാഗമായതും. സ്ഫോടകവസ്തുക്കൾ കണ്ടെത്തുന്നതിലാണ്  ബീഗിൽ ഇനത്തിൽപ്പെട്ട ബെർട്ടിയുടെ മിടുക്ക്.  വിമാനത്താവളങ്ങളിലും റയിൽവെ സ്റ്റഷനുകളിലും സ്ഫോടക വസ്തുക്കൾ മണത്തറിയാൻ മിടുക്കി . പഞ്ചാബ് ഹോം ഗാർഡ് ഡിപ്പാർട്ട്മെന്റില്‍നിന്നാണ് ഇവരെ വാങ്ങിയത്.  വൈകാതെ ഇരുവരും ഡ്യൂട്ടിക്കിറങ്ങും. 

English Summary: Two premium breeds add teeth to police dog squad