ബംഗ്ലാദേശ് ഏകദിന ടീമിന്റെ ക്യാപ്റ്റനായിരുന്ന തമിം ഇഖ്ബാൽ ഖാൻ വിരമിക്കൽ തീരുമാനം പിൻവലിച്ച് വീണ്ടും ബംഗ്ലാ ക്രിക്കറ്റ് ടീമിന്റെ ഭാഗമാകുമ്പോൾ അത് ആരാധകർക്ക് പകരുന്ന ആത്മവിശ്വാസം ചെറുതല്ല. അഫ്ഗാനിസ്ഥാനെതിരായ ഏകദിന പരമ്പരയിലെ ആദ്യ മത്സരത്തിൽ (വേദി: ചിറ്റഗോങ്) 17 റൺസിന് പരാജയപ്പെട്ടതിനു പിന്നാലെയാണ് ഓപ്പണർകൂടിയായ നായകൻ വ്യാഴാഴ്ച വിരമിക്കൽ പ്രഖ്യാപിച്ചത്. മൽസരത്തിൽ തമിം നേടിയത് വെറും 13 റൺസ് മാത്രവും. വിരമിക്കാനുള്ള തീരുമാനം പെട്ടെന്ന് എടുത്തതല്ലെന്നും കാരണങ്ങൾ പലതുണ്ടെന്നും അദ്ദേഹം പത്രസമ്മേളനത്തിൽ പറയുകയുണ്ടായി.