6 വർഷത്തിനുശേഷം വീണ്ടും ചിലങ്കയണിഞ്ഞ് കലാമണ്ഡലം ഹൈമവതി

കൂറ്റനാട് ∙ കോതച്ചിറ ചിറയ്ക്കൽ മഹാവിഷ്ണു ക്ഷേത്രത്തിൽ മോഹിനിയാട്ടം അവതരണവുമായി കലാമണ്ഡലം ഹൈമവതി. 6 വർഷത്തിനു ശേഷമാണ് ഹൈമവതി ചിലങ്ക അണിയുന്നത്. ക്ഷേത്രത്തിന്റെ നവീകരിച്ച ഊട്ടുപുര സമർപ്പണ ചടങ്ങിനോടനുബന്ധിച്ചാണു പരിപാടി സംഘടിപ്പിച്ചത്. വേങ്ങാട്ടൂർ മന തുപ്ഫൻ നമ്പൂതിരിപ്പാടിന്റെ സ്മരണാർഥം അദ്ദേഹത്തിന്റെ പേരക്കുട്ടികളാണ് ഊട്ടുപുര നവീകരിച്ചു നൽകിയത്. ധന്വന്തരി ഹോമം, ഔഷധസേവ, സംഗീതക്കച്ചേരി, പ്രസാദ ഊട്ട് എന്നിവയും നടന്നു. കുച്ചിപ്പുഡി, തിരുവാതിരക്കളി എന്നിവയും ഉണ്ടായി.