പ്രിയപ്പെട്ടവർക്ക് നാട് കണ്ണീരോടെ വിടചൊല്ലി; കുവൈത്ത് തീപിടിത്തത്തിൽ മരിച്ചവരുടെ സംസ്കാരം നടത്തി
![thiruvalla-funeral-of-malayali-family-killed-in-fire-in-kuwait കുവൈത്തിൽ ഫ്ലാറ്റിലുണ്ടായ തീപിടുത്തത്തെ തുടർന്നു വിഷപ്പുക ശ്വസിച്ചു മരിച്ച ആലപ്പുഴ തലവടി നീരേറ്റുപുറം മുളയ്ക്കൽ മാത്യൂസ്, ഭാര്യ ലിനി എബ്രഹാം,മക്കളായ ഐറിൻ, ഐസക് എന്നിവരുടെ മൃതദേഹങ്ങൾ തലവടി പടിഞ്ഞാറേക്കര പള്ളിയിൽ പൊതുദർശനത്തിനു വച്ചപ്പോൾ മാത്യൂസിന്റെ അമ്മ റെയ്ച്ചലിനെയും ലിനിയുടെ അമ്മ ഡില്ലിയെയും ചേർത്തുപിടിച്ച് ആശ്വസിപ്പിക്കുന്ന ലിനിയുടെ സഹോദരൻ ലിജോ. ചിത്രം : മനോരമ.](https://img-mm.manoramaonline.com/content/dam/mm/mo/global-malayali/gulf/images/2024/7/26/thiruvalla-funeral-of-malayali-family-killed-in-fire-in-kuwait.jpg?w=1120&h=583)
Mail This Article
എടത്വ ∙ കുവൈത്ത് അബ്ബാസിയായിൽ ഫ്ലാറ്റിൽ ഉണ്ടായ അഗ്നിബാധയിൽ വിഷപ്പുക ശ്വസിച്ച് മരിച്ച തലവടി നീരേറ്റുപുറം മുളയ്ക്കൽ മാത്യൂസ് വർഗീസ് മുളയ്ക്കൽ (40), ഭാര്യ ലിനി ഏലിയാമ്മ (39), മക്കളായ എട്ടാം ക്ലാസ് വിദ്യാർഥി ഐറിൻ റേച്ചൽ മാത്യൂസ് (14), നാലാം ക്ലാസ് വിദ്യാർഥി ഐസക് മാത്യൂസ് മുളയ്ക്കൽ (10) എന്നിവരുടെ മൃതദേഹങ്ങൾ സംസ്കരിച്ചു. വീട്ടിലും പള്ളിയിലുമായി ആയിരക്കണക്കിനാളുകൾ അന്ത്യാഞ്ജലി അർപ്പിച്ചു.
23ന് നാട്ടിലെത്തിച്ച മൃതദേഹങ്ങൾ തിരുവല്ലയിലെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുകയായിരുന്നു. ഇന്നലെ പുലർച്ചെ മൂന്നോടെ മൃതദേഹങ്ങൾ 4 ആംബുലൻസുകളിലായി വീട്ടിലേക്ക് എത്തിച്ചു. വീട്ടിലെ അന്ത്യകർമങ്ങൾക്കു ശേഷം 8.30 ന് ഇടവക പള്ളിയായ തലവടി പടിഞ്ഞാറേക്കര മാർത്തോമ്മാ പള്ളിയിൽ എത്തിച്ചു. ഇവിടെ പൊതുദർശനത്തിനു ശേഷം 12.15 ന് മാർത്തോമ്മാ സഭാ പരമാധ്യക്ഷൻ ഡോ. തിയഡോഷ്യസ് മാർത്തോമ്മാ മെത്രാപ്പൊലീത്തയുടെ മുഖ്യകാർമികത്വത്തിൽ സംസ്കാര ചടങ്ങുകൾ ആരംഭിച്ചു. ഡോ. യുയാക്കിം മാർ കൂറിലോസ്, ഗ്രിഗോറിയോസ് മാർ സ്തേഫാനോസ്, ഡോ. മാത്യൂസ് മാർ മക്കാറിയോസ്, മാത്യൂസ് മാർ സെറാഫിം , മലങ്കര കത്തോലിക്കാ സഭ തിരുവല്ല അതിരൂപത ആർച്ച് ബിഷപ് ഡോ. തോമസ് മാർ കൂറിലോസ്, ഇവാഞ്ചലിക്കൽ ചർച്ച ഓഫ് ഇന്ത്യ പ്രിസൈഡിങ് ബിഷപ് ഡോ. തോമസ് ഏബ്രഹാം തുടങ്ങിയവർ പങ്കെടുത്തു.
![malayali-family-dies-in-kuwait-fire കുവൈത്തിൽ മരിച്ച മാത്യൂസ് മുളയ്ക്കൽ, ഭാര്യ ലിനി ഏബ്രഹാം, മക്കളായ ഐറിൻ, ഐസക് എന്നിവർ. നീരേറ്റുപുറത്തു പുതുക്കി പണിത വീട്.](https://img-mm.manoramaonline.com/content/dam/mm/mo/config-assets/mo-default.jpg)
മന്ത്രി സജി ചെറിയാൻ, കൊടിക്കുന്നിൽ സുരേഷ് എം.പി, എംഎൽഎമാരായ രമേശ് ചെന്നിത്തല, തോമസ് കെ. തോമസ്, മാത്യു ടി. തോമസ്, മുൻ എംഎൽഎ ജോസഫ് എം പുതുശേരി, ജില്ലാ പഞ്ചായത്ത് പ്രസിഡന്റ് കെ.ജി. രാജേശ്വരി എന്നിവർ അന്ത്യോപചാരം അർപ്പിക്കാൻ എത്തിയിരുന്നു.