ഇഞ്ചി സ്‌ട്രോക്കിന് കാരണമാകുമെന്ന തെറ്റായ വിവരം പ്രചരിപ്പിച്ചയാൾക്കെതിരെ നടപടിയുമായി സൗദി ആരോഗ്യ മന്ത്രാലയം

റിയാദ്∙ 80 ശതമാനം സ്‌ട്രോക്കിനും  ഇഞ്ചി കാരണമാകുന്നു എന്ന തെറ്റായ വിവരം പ്രസിദ്ധീകരിച്ചതിനെ തുടർന്ന് ആരോഗ്യ മന്ത്രാലയം മെഡിക്കൽ പ്രാക്‌ടീഷണറെ വിളിച്ചുവരുത്തി. ഇയാൾക്ക് ലൈസൻസില്ലെന്ന് കണ്ടെത്തിയതിനെ തുടർന്ന് തുടർനടപടികൾക്കായി ബന്ധപ്പെട്ട അധികാരികൾക്ക് കൈമാറി.

  ആരോഗ്യ വിവരങ്ങൾ ഔദ്യോഗിക സ്രോതസ്സുകളിൽ നിന്ന് മാത്രം തേടണമെന്ന് പൗരന്മാരോടും വിദേശികളോടും മന്ത്രാലയം അഭ്യർത്ഥിച്ചു. തെറ്റായ വിവരങ്ങൾ പ്രചരിപ്പിച്ച് സമൂഹത്തെ ആശയക്കുഴപ്പത്തിലാക്കുകയോ അവരുടെ ആരോഗ്യത്തെ ബാധിക്കുകയോ ചെയ്യാതിരിക്കാൻ ലഭിക്കുന്ന വിവരങ്ങൾ പൊതുജനങ്ങളിലേക്ക് എത്തിക്കുന്നതിന് മുൻപ് അവയുടെ ആധികാരികത ഉറപ്പുവരുത്തണമെന്നും മന്ത്രാലയം അറിയിച്ചു.