പിഎസ്‌സി മാന്വൽ രഹസ്യരേഖയല്ല: സംസ്ഥാന വിവരാവകാശ കമ്മിഷൻ

പിഎസ്‌സിയുടെ ഓഫിസ് മാന്വലും റിക്രൂട്മെന്റ് മാന്വലും രഹസ്യരേഖയല്ലെന്നും അവ ആവശ്യപ്പെടുന്നവർക്കു നൽകണമെന്നും സംസ്ഥാന വിവരാവകാശ കമ്മിഷന്റെ ഉത്തരവ്. പിഎസ്‌സിയുടെ പ്രവർത്തനത്തിലെ രഹസ്യ സ്വഭാവത്തെ ബാധിക്കുമെന്നതിനാൽ അവ നൽകാൻ കഴിയില്ലെന്ന മറുപടി തള്ളിയാണ് വിവരാവകാശ കമ്മിഷണർ ഡോ.എ.അബ്ദുൽ ഹക്കീം ഉത്തരവിറക്കിയത്. ചോദ്യപ്പേപ്പർ സൂക്ഷിക്കുന്ന വിധം, ഉത്തരക്കടലാസുകൾ കൈകാര്യം ചെയ്യുന്ന രൂപം തുടങ്ങി സ്വാഭാവികമായി സംരക്ഷിക്കേണ്ട രഹസ്യ വിവരങ്ങൾ ഒഴികെയുള്ളവയെല്ലാം പൗരർക്ക് അറിയാൻ അവകാശമുണ്ടെന്നും അതു നിഷേധിക്കരുതെന്നും കമ്മിഷണർ നിർദേശിച്ചു.

പിഎസ്‌സിയുടെ പ്രവർത്തനങ്ങൾ സുതാര്യമായിരുന്നാൽ മാത്രം പോരാ, അതു ജനങ്ങളെ ബോധ്യപ്പെടുത്തുകയും വേണമെന്ന് ഉത്തരവിൽ ചൂണ്ടിക്കാട്ടി. കോഴിക്കോട് പയ്യോളി നമ്പൂരിമഠത്തിൽ എൻ.എം.ഷനോജ് കോഴിക്കോട് ജില്ലാ പിഎസ്‌സി ഓഫിസിൽ നൽകിയ ഹർജി അവിടെനിന്നു തിരുവനന്തപുരം ആസ്ഥാനത്തേക്ക് അയച്ചിരുന്നു. അതു നിഷേധിച്ചതിനെത്തുടർന്നാണു വിവരാവകാശ കമ്മിഷനു ഹർജി നൽകിയത്. അതീവരഹസ്യ സ്വഭാവമുള്ള വിവരങ്ങൾ തരംതിരിച്ചുമാറ്റി ബാക്കിയുള്ളവ നൽകണം. നൽകാത്ത വിവരങ്ങൾ ഏതൊക്കെ മേഖലയെ സംബന്ധിച്ചുള്ളതാണെന്നു കക്ഷിയെ അറിയിക്കണമെന്നും കമ്മിഷൻ നിർദേശിച്ചു.