ഒരുരക്ഷയുമില്ല; മലയാളസിനിമയുടെ ശിവനും ശക്തിയുമെന്ന് ആരാധകർ; റെക്കോർഡ്

മലയാളം സിനിമാ പ്രേമികൾ ഏറെ ആകാംക്ഷയോടെ കാത്തിരുന്ന  ചിത്രമായിരുന്നു ലൂസിഫർ. മോഹൻലാൽ ആരാധകരെ അൽപം പോലും നിരാശപ്പെടുത്താതെയാണ് ചിത്രം എത്തിയത്. ചിത്രത്തിനൊപ്പം തന്നെ സോഷ്യൽ മീഡിയയിൽ തരംഗമാകുകയാണ് ഗാനങ്ങളും. ലൂസിഫറിലേതായി ഒടുവിൽ എത്തിയ കടവുളെ പോലെ എന്ന ഗാനം യൂട്യൂബിൽ തരംഗമാകുകയാണ്. റിലീസ് ചെയ്ത് മണിക്കൂറുകള്‍ക്കകം തന്നെ യൂട്യൂബ് ട്രിന്റിങ്ങിൽ ഒന്നാമതെത്തിയ ഗാനം ഇപ്പോഴും ട്രന്റിങ്ങിൽ തുടരുകയാണ്. 

നിലവിൽ ട്രന്റിങ്ങിൽ എട്ടാമതാണു ഗാനം. പന്ത്രണ്ടുലക്ഷത്തോളം ആളുകൾ ഇതിനോടകം ഗാനം യൂട്യൂബിൽ കണ്ടുകഴിഞ്ഞു. കാർത്തികിന്റെതാണ് ആലാപനം. ലോഗന്റെ വരികള്‍. ദീപക് ദേവിന്റെ സംഗീതം. മോഹൻലാൽ ആരാധകരുടെ ആവേശം വാനോളം ഉയർത്തുന്നതാണ് ഗാനം. ‘താരആരാധനയുടെ അങ്ങേയറ്റം’  എന്നാണ് ലൂസിഫറിനെ വിലയിരുത്തുന്നത്. ഒപ്പം പൃഥ്വിരാജ് എന്ന സംവിധായകന്റെ മിടുക്കും ലൂസിഫറിനെ മികച്ച ചിത്രങ്ങളുടെ പട്ടികയിലേക്ക് ഉയർത്തുന്നു.

‘മലയാള സിനിമയിലെ ശിവനും ശക്തിയുമാണ് മോഹൻലാലും മഞ്ജുവാര്യരും’ എന്നാണ് ആരാധകരുടെ വിലയിരുത്തൽ. പൃഥ്വിരാജിന്റെ മേക്കിങ്ങിനെ പ്രശംസിക്കുന്നവരും നിരവധി. ഇന്ദ്രജിത്ത്, ടൊവീനോ എന്നിങ്ങനെ വൻതാരനിര തന്നെ ചിത്രത്തിൽ‌ എത്തുന്നുണ്ട്. പൃഥ്വിരാജ് സംവിധാനം ചെയ്തിരിക്കുന്ന ചിത്രത്തിനു തിരക്കഥ ഒരുക്കിയിരിക്കുന്നത് മുരളി ഗോപിയാണ്. സുജിത്ത് വാസുദേവാണ് ഛായാഗ്രഹണം. തീയറ്ററിൽ മികച്ച പ്രതികരണം നേടി മുന്നേറുകയാണ് ചിത്രം.