മോദിയോ രാഹുലോ ? രാഹുൽ എന്ന് സദസ്യർ; വെട്ടിലായി മഹിളാ മോർച്ച നേതാവ്

മുംബൈ ∙ ‘ആരെ വേണം ? നരേന്ദ്ര മോദിയോ രാഹുൽ ഗാന്ധിയോ?’ പൊതുയോഗത്തിൽ ബിജെപി വനിതാ നേതാവിന്റെ ചോദ്യത്തിന് ‘രാഹുൽ ഗാന്ധി’ എന്നു സദസ്യരുടെ മറുപടി. മഹിളാ മോർച്ച കോലാപുർ ജില്ലാ പ്രസിഡന്റ് ഷൗമിക മഹാദിക്കാണ് വടികൊടുത്ത് അടിവാങ്ങിയത്. ഉത്തരം കേട്ട ഷൗമിക ആദ്യം െചറുതായി ഞെട്ടുന്നതും പിന്നീട് ചിരിയിലൂടെ ലഘൂകരിക്കാൻ ശ്രമിക്കുന്നതും വിഡിയോയിൽ കാണാം. 

കോൺഗ്രസ് സൈബർ വിഭാഗം വിഡിയോ ഏറ്റെടുത്തിരിക്കുകയാണ്. ‘ബിജെപി പ്രവർത്തകരുടെ മൻ കീ ബാത്ത്’ കേൾക്കുക എന്ന കുറിപ്പുമായി കോൺഗ്രസ് മുംബൈ ഘടകം അധ്യക്ഷ വർഷ ഗായ്ക്‌വാഡ് വിഡിയോ എക്സിൽ ഷെയർ ചെയ്തു. ശിവസേന ഷിൻഡെ വിഭാഗത്തിലെ സഞ്ജയ് മണ്ഡലികാണ് കോലാപുരിലെ എൻഡിഎ സ്ഥാനാർഥി. ഛത്രപതി ശിവാജിയുടെ പിൻഗാമിയായ ഷാഹു മഹാരാജാണ് കോൺഗ്രസ് സ്ഥാനാർഥി.