അനധികൃത ഖനനം: സിപിഎം ഇടുക്കി ജില്ലാ സെക്രട്ടറിക്കും മകനും മരുമകനുമെതിരെ അന്വേഷണം

തൊടുപുഴ∙ അനധികൃത ഖനനം നടത്തിയെന്ന പരാതിയിൽ സിപിഎം ഇടുക്കി ജില്ലാ സെക്രട്ടറി സി.വി.വർഗീസിനും മകനും മരുമകനുമെതിരെ അന്വേഷണത്തിന് ഉത്തരവ്. പേരു വെളിപ്പെടുത്തരുതെന്ന് ആവശ്യപ്പെട്ട് പൊതുപ്രവർത്തകൻ നൽകിയ പരാതിയിൽ ജില്ലാ കലക്ടറാണ് അന്വേഷണത്തിന് ഉത്തരവിട്ടത്. ഉടുമ്പൻചോല താലൂക്കിലെ വിവിധ വില്ലേജ് പരിധിയിലായി വർഗീസും മകൻ അമലും മരുമകൻ സജിത്തും ചേർന്ന് അനധികൃതമായി പാറ പൊട്ടിക്കലും മണ്ണ് കടത്തലും നടത്തുന്നുണ്ടെന്നാണ് പൊതുപ്രവർത്തകൻ കലക്ടർക്ക് പരാതി നൽകിയത്. 

തുടർന്ന് പരാതി അന്വേഷിക്കാൻ കലക്ടർ തഹസിൽദാർമാർക്കും തഹസില്‍ദാർമാർ അതാത് വില്ലേജ് ഓഫിസർമാർക്കും നിർദേശം നൽകി. നേരത്തെ സിപിഎം ജില്ലാ സമ്മേളനം നടക്കുമ്പോഴും വർഗീസിനെതിരെ അനധികൃത ഖനന ആരോപണങ്ങൾ ഉയർന്നിരുന്നു.