ബോംബെ മിക്സ്ചർ, എത്ര കഴിച്ചാലും മടുക്കില്ല

ആഘോഷങ്ങൾ ഏതു തന്നെയായാലും മലയാളിക്ക് ഒഴിച്ചുകൂടാൻ കഴിയാത്ത വിഭവമാണ് മിക്സ്ചർ. തൊലിയോടു കൂടിയ മസൂർ പരിപ്പ് വറുത്ത് ചേർക്കും. ഇതിന് മഞ്ഞ മിക്സ്ചർ എന്നും മുട്ട മിക്സ്ചർ എന്നും പറയാറുണ്ട്.

ചേരുവകൾ

• കടലമാവ് - അര കിലോ
• നെയ്യ് - ഒരു ടേബിൾ സ്പൂൺ
• മഞ്ഞൾപ്പൊടി - അര ടീസ്പൂൺ
• കായപ്പൊടി - അര ടീസ്പൂൺ
• ഉപ്പ് - ആവശ്യത്തിന്
• മസൂർ പരിപ്പ് - മുക്കാൽ കപ്പ്
• ചെറുപയർ - അര കപ്പ്
• ചാറ്റ് മസാല - ഒരു ടീസ്പൂൺ
• മുളകുപൊടി - ഒരു ടീസ്പൂൺ
• കപ്പലണ്ടി - അരക്കപ്പ്
• അണ്ടിപ്പരിപ്പ് - അര കപ്പ്
• എണ്ണ - വറുക്കാൻ ആവശ്യത്തിന്

തയാറാക്കുന്ന വിധം

• മസൂർ പരിപ്പും ചെറുപയറും നന്നായി കഴുകി ആറു മണിക്കൂർ വെള്ളത്തിൽ കുതിർത്തു വയ്ക്കുക.
• കടലമാവിൽ നെയ്യ്, മഞ്ഞൾപ്പൊടി, കായപ്പൊടി, ഉപ്പ്, ഇവ ചേർത്ത് കൈകൊണ്ട് നന്നായി യോജിപ്പിക്കുക. വെള്ളം കുറേശ്ശേ ഒഴിച്ച് കൊടുത്ത് ചപ്പാത്തി മാവിന്റെ പരുവത്തിൽ കുഴച്ചെടുക്കുക.
• ഒരു സേവനാഴിയിൽ ഇടിയപ്പത്തിന്റെ ചില്ലിട്ട് അൽപം നെയ്യ് തടവിയ ശേഷം മാവ് നിറയ്ക്കുക.
• ഒരു ചീനച്ചട്ടിയിൽ എണ്ണ ചൂടാക്കുക. റിഫൈൻഡ് ഓയിലാണ് നല്ലത്.
• എണ്ണ നന്നായി ചൂടാകുമ്പോൾ തീ കുറച്ച് സേവനാഴിയിൽ നിന്നും കടലമാവ് എണ്ണയിലേക്ക് ചുറ്റി ഒഴിക്കുക.
• ഒരു വശം മൂത്ത് തുടങ്ങുമ്പോൾ തിരിച്ചിട്ട് മറുവശവും മൂപ്പിച്ചെടുക്കുക.
• തയാറാക്കിയ കടലമാവു മുഴുവൻ ഇങ്ങനെ വറുത്തതിനുശേഷം കൈകൊണ്ട് ചെറിയ കഷണങ്ങളാക്കി ഉടച്ചു വയ്ക്കുക
• ഇതേ എണ്ണയിൽ മസൂർ പരിപ്പും ചെറുപയറും ഒന്നിച്ച് വറുത്ത് കോരുക. അൽപം  ഉപ്പ് വെള്ളത്തിൽ കലക്കിയതുകൂടി ചേർത്തുകൊടുക്കണം. നന്നായി മൊരിഞ്ഞു കഴിയുമ്പോൾ കോരി മാറ്റുക. ചൂടോടുകൂടെതന്നെ ചാറ്റ് മസാലയും മുളകുപൊടിയും ചേർത്ത് യോജിപ്പിക്കുക.
• ബാക്കി ഉള്ള എണ്ണയിൽ കപ്പലണ്ടിയും അണ്ടിപ്പരിപ്പും വറുത്തുകോരുക.
• വറുത്തെടുത്ത ചേരുവകളെല്ലാം കൂടി നന്നായി യോജിപ്പിക്കുക.
• നന്നായി ചൂടാറിയ ശേഷം വായു കടക്കാത്ത പാത്രത്തിലാക്കി അടച്ചു സൂക്ഷിക്കാം. രണ്ടു മാസം വരെ കേടാവാതെ ഇരിക്കും.

English Summary : Ideal with tea, its sweet-salty-spicy flavour makes for an ideal crunchy.